Kam chibynta wow pynsñiawthooh yei emkaam wow pynneh pynsah ya ka rymaw, da pynman ya ka yalang hajrong ki aiñ wow pynneh pynsah ya ki khloo ki kjam kamjooh ki mrad khloo ha Meghalaya wei ya kani ka yalang da pynman daka Meghalaya State Judicial Academy, WWF-India waka TRAFFIC India ynne ka sngi ha Conference Hall ka Meghalaya High Court, Shillong.
Hawa e yei klam, neiliang u Chief Justice ka High Court ka Meghalaya, u Justice Sanjib Banerjee da ong u wa da em boon ki aiñ wow yada ya ka rymaw tangwa tlot won i pynkrehkaam ya ki.
Da ong u wa ka pyrthai da em ko palat 4 Billion snem wei u bru da em u kamwa 300,000 snem tangwa da pynsih u ya palat 3 Million tylli ki jait wa im yow pynhun yeiwa emkaam u.
Da kdaw u leh yeiwa nang ku ki kaam uiñke suwari hapoh ka jylla, deiwa ong wa emkaam wow pyrkhat jngai hajrong ini, kamtæ da ong u yow pynneh pynsah yeiwa miat ka Meghalaya yow lait u jia kam ya kiwi ki chnong ka ri da toh u em ka thong krehkaam.
Da ong u leh wa u bru da man u kam i kjut Cancer ya ka pyrthai deiwa pynrap wa i stat u bru da pynman ya oo wym bna de u wei da mylliñ u yeiwa jooh imlang u wa kiwi kiwa em ha kylleiñ ka pyrthai.
Da ong u leh wa ym ye wow yaleh pyrchah ya ka rymaw yow im i deiwa e nongmuna wa ki yung bichaar da pynmih ki boon ki hukum yow yada ya ka rymaw kamjooh ki mrad tangwa da emkaam wow pynkrehkaam bha ya ki aiñ.
Kiwi de kiwa klam ha kani ka sngi toh u ADN Rao, Senior Advocate, Supreme Court ka India wa u S M Sahai, PCCF wa Chief Wildlife Warden, Meghalaya.
