Jowai: I pyndih dawai wieh ya ki khynnah wa hapoh 19 snem i rta da sdang i ynne ka sngi ha West Jaiñtia Hills District kawa man leh ka sngi wa tip kam ka National Deworming Day (NDD) kawa jooh pynman khlieh u snem hapoh ka ri hajrong ka thong ka sorkar pyrdi lyngba ka Ministry of Health and Family Welfare neibynta i chait i khiah ki khynnah wa hapoh 19 snem.
Ya kani ka sngi e dawai da sdang da ka yalang wa da pynman ha Ladthadlaboh Urban Primary Health Center (UPHC) Jowai, heiwa da pynlai ya ka da ka Dr. E. Challam kawa man leh kam ka Additional DMHO, heiwa da emlang leh u Dr. S. Warbah uwa man kam u Urban Health Consultant, ki wakreh kani ka thaw sumaar wa kynthup leh nadooh ki Asha, ANM deiwa emlang ki khynnah wa kiwi kiwi.
Ka Dr. M. Syngkon, District MCH Officer, da pynche ko hajrong i emkaam wow dih dawai wieh deiwa ong wa lada ki khynnah ym dih dawai wieh ki, ki dak ki chin daw paw ki kam i at kpoh, pynhiar kpoh, prai, duna snaam wa kiwi kiwi katwa kamtæ da kyntu ko wow man kiwa lehkhooid wei saitkhooid ya ki kti chwa u baam.
Neiliang u kongsan ha kani ka sngi, u L. Kynjing uwa man leh kam u Additional Deputy Commissioner ka District, da kyntu u ya ki manbei manpa ki khynnah wow pyndih dawai wieh ya ki khon ki kti yong ki khlem iwon iwon i tieñ i sorsa.
Chooh chooh da kyntu u leh ya ki Asha kiwa kreh yei kaam hajrong i chait i khiah wow tia ki chaphrang wow pynsñiawthooh ya ki manyung hajrong ini i dawai.
Neiliang won ka Dr. J Shullai kawa man leh kam ka MO yong ka Ladthadlaboh UPHC da e ko ya ki kyntien khublei.
