Uwa yahkhmat ka BJP uwa man leh u MLA ka South Shillong wa u Montri warim ha ka sorkar, u Sanbor Shullai da beiñ joor u ya ki bru kiwa tympra phrai ya u mot dur yong u Syiem Tirot Sing uwa da pynyieñ ha Dhaka, Bangladesh da ka sorkar India.
Da ong u wa ki bru wym man kiwa em yei mynsien mrad mynsien ksuid kiwa da pynsih pynpra ya u mot yong u Tirot Sing ha Dhaka, deiwa ong leh wa kini ki bru kiwa man kam ki bru khloo neibhah wot ya u mot yong uwa pynyoh laitlooid ya ki, u Sheikh Mujibur Rahman leh ym maap de ki wei da tympra ki phrai.
U Sanbor uwa man uwa mait phang wow pynyieñ ya u mot sahnaam yong u Tirot Sing ha Dhaka, heiwa da yaklam u chadooh Delhi wow lum leh ya kiwa synchaar hima wow yasyllok kammon wow pynmankaam yeini wa thmu, wei ha u Thohlakhmi (Feb) uni u snem da yoh wow pynyieñ ya u mot yong u khlawait u Syiem ka Hima Nongkhlaw ha Indian Cultural Centre, ya kiwa ki paidbhur da tympra ki phrai nei kynaad ha katai ka ri.
U Sanbor da ong u leh wa daw yaklam u wa ka sorkar neibynta wow chna biang ya u mot wa chirynyieñ yong u Tirot Sing ha katai ka jooh ka thaw.
Discussion about this post