Ka International Day of Older Persons da lehwarom ya ka ynne ha East Jaiñtia Hills District hajrong ka phang “The Resilience and Contribution of Older Women” heiwa da lehwarom ya ka da ka District Social Welfare Officer, chirup wa ka yung krehkaam u District Medical & Health Officer ha Sohkhymphor.
Ha kani ka sngi da emlang u Dr. N. Nongpluh, Medical & Health Officer, Khliehriat Civil Hospital, Dr. Banri Khongngain, Medical & Health Officer, Khliehriat Civil Hospital wa ka R. Passah, District Social Welfare Officer, u R. Marpna, Field Response Officer, Elder Helpline wa kiwi kiwi.
Ka R. Passah, District Social Welfare Officer hawa e yei klam da ong ko wa ya kani ka sngi da jooh lehwarom ha ka 1 tarik u Naichiphaw man-u-snem wow pynsñiawthooh paidbah ya i kordor ki bru wa da heh rta ha ka imlang sahlang wei kamjooh leh wow burom yeiwa da leh ki.
U Dr. N. Nongpluh da ong ko wa ya ka International Day of Older Persons da sdang wow lehwarom ha u 1990 wei katni emkaam wow tip i wow yaroh u burom yeiwa da leh ki bru wa da heh rta ha ka imlang sahlang.
Heiyatoh wa u Elder Helpline, Meghalaya, u R. Marpna da ong u wa ka Elder Helpline Meghalaya toh wa da sdang ha ka 19 Thohlakhmi 2021 neibynta ki bru wa da heh rta wei uni u Helpline yarap u ya ki ha kiwa boon ki liang nadooh ki kaam aiñ, wow pynche hajrong ka Maintenance Act 2007, ki Pension Scheme wa kiwi kiwi.
Da ong u wa ki bru wa da heh rta kiwa chah lehbeiñ ye ki wow yoh yarap na u Elder Helpline Toll Free Number for Senior Citizens uwa man 14567 heiwa ye u e ya i sneiñ kyntu wa kamjooh leh i thaw sah wa chipor ya ki bru wa da heh rta.
Ha kani ka sngi da e sñiawbha leh ya ki tiar cha ki bru wa da heh rta da ka yung krehkaam District Social Welfare Officer wei da pynman leh ya ka Free Medical Health Checkup Camp da ka yung krehkaam District Medical & Health Officer, Khliehriat.
