U Montri Rangbah ka jylla, u Conrad K Sangma hawa e jubab yeiwa kylli u MLA ka Liang Pyrchah, u Brightstarwell Marbaniang heiyatoh wa ki Consultant wa pynemkaam hapoh ka jylla kattæ, da jubab u wa ki Individual Consultant da em ki 39 ngut heiwa 30% toh ki bru kiwa napoh ka jylla wei ki Consultancy Firm da em ki 69 tylli.
Da pyntip leh wa ka poisa wa da su cha kini ki Consultant toh kawa da kheiñlang hapoh ka kreh namo ka Project kawa da yoh hadooh ka bai lai bai wan ki tangwa em ki por wa su ka sorkar manda phah ya ki wow leh ki yeiwa ym em hapoh ka Project katkam wa da pynbait chwa.
Da pynche u leh wa kini ki Consultant da hap wow thung neibhah kini ki kreh wa yoh na World Bank, Asian Development Bank da booh kyndon ki wa emkaam wow thung ki Consultant wei da su ya ki leh da kini ki Bank deiwa kheiñlang i dor i kreh heiwa 1% da booh neibynta ki Consultant.
U Brightstarwell da kylli u wa ileh wym pynemkaam da ki Engineer yong i kamjooh ki Graduate ki wym em kreh, næ wym hoi ki mo neibhah em ki por iwa sikai ha ki College wa ki University phær bha i yeiwa emkaam cha ki thaw kreh.
U Conrad da ong u wa bien hi ka sorkar wow chdooh wei wow yahluti ya ki bru yong i, tangwa ha kini ki por wa dep poi ki laad ki kabu ki wym hoi u dooh kam i pynkhreh DPR wa khut da ka sorkar pyrdi wa tip kam ka Challenge Based Destination Development hapoh ka Swadesh Darshan heiwa neiliang ka sorkar wa em ko ki Consultant wa biang da ye ko wow phah smat ya ka DPR kiwa biang lut wei ki kyndon wa da booh leh toh kiwa man Technical bha wot kiwa kreh ka sorkar leh ym tip ki tangwa deiwa em ki Consultant kiwa pliah wa chemphang da yoh ka Meghalaya ₹200 klur neibynta ki kaam Tourism.
Da e nongmuma u leh wa hadien wa yachem waka Finance Minister ka ri yow paan yarap yow chna sarok, da ong ko wow phah ka DPR hapoh 48 kynta heiwa ki Consultant da ye ki wow leh yeini wei ka sorkar pyrdi da e ko ₹2400 klur.
Da khana u leh wa ka jylla da yoh ko 13 tylli ki Externally Aided Project (EAP) kam na ka Word Bank, Asian Development Bank wa kiwi de kiwa dapoi ₹7427 klur wei u pynkhreh DPR neibynta kini da emkaam ki bru wa tip ya ki aiñ wa krehkaam hapoh ka pyrthai, kiwa sñiawthooh ki kyndon wa boon jait katkam ki kyrdan ka pyrthai, kamtæ ym yohsa wow thooh da ki Consultant.
Hawa kylli u MLA ka Liang Pyrchah, u Ardent Basaiawmoit wa joor heh i su ya kini ki Consultant katwa ki bru yong i won yoh ki du kattu katni, u Conrad da pynche u wa da su bait kat i kaam wa ye ki u leh wei lada kiwa napoh ka jylla ye ki wow leh da su ya kat jooh ym em itæ i leh chiliang.
Da ong u leh wa ki kreh wa da wanrah deiwa yarap ki Consultant khamtam ki kaam Tourism daw yarap ko wow pynyoh kreh ya ki bru yong i wei kiwa kreh wa kini ki Consultant leh toh ki bru napoh ka jylla hi.
Da e nongmuna u leh wa deiwa em ki Consultant da ye u phah smat ya ka DPR heiwa ka jylla da yoh ko ₹132 klur neibynta u chna ya ka Unity Mall heiwa kiwa daw chong dukan hapoh yong ka toh du ki tre jylla.
Da pynche u leh hawa khut ya kiwon kiwon ki Consultant da leh deiwa khut Tender wei da kreh ki katkam i kreh wa toh u pyndep ki katkam i por wa da booh wei ymtoh da ka tulop.
Discussion about this post