Ka Meghalaya Institute of Governance (MIG) ka sorkar Meghalaya deiwa ya krehlang waka Department of Economics, North Eastern Hill University (NEHU) ynne da pynman ki ya ka State Conference wa chi sngi hajrong ka phang “Strengthening the Finances and Financial Accountability of Autonomous District Councils in Meghalaya” ha State Convention Centre, Shillong. Kani da man ko ka sien wa nyngong wow khutlang ya kiwa mihkhmat ki Autonomous District Councils wa ki yong ka sorkar jylla deiwa emlang ki bru chemphang yow yaklam yei eh i khoo hawa yatoh wa ki kaam poisa poilaiñ.
Neiliang u Lahkmen Rymbui, Montri ka District Council Affairs da wan u wow embynta kam u kongsan katwa u Titosstarwell Chyne, Chief Executive Member, KHADC da man u kam u symbood kongsan.
Hawa e yei klam, u Lahkmen Rymbui da khana u yei emkaam wow booh yukheiñ katkam ka juk wa katni wei wow lai katkam ki kyndon krehkaam ka sorkar. Heiwa ha kani ka juk Technology da em boon ki rukom booh yukheiñ yow pynsuk wei wow pynbait wei ki ADC emkaam ki wow leh noh da kini ki rukom wa thymme.
I thmu kani ka yalang toh yow pynsñiawthooh ya ki ADC, ka sorkar jylla kamjooh yow khana wa kammon i rukom synchaar chnong ha kiwi ki bynta ka ri da leh ki khamtam ha ki thaw wa em cha palatsor heiwa ki da pynkhlan da pynthymme ki yei rukom kheiñ sap wa i rukom pynlai ya ka poisa poilaiñ wei da yaklam leh kammon wow ye u yarap ya ki ADC yow man leh iwa khooid wa suba heiyatoh wa ki kaam poisa ki Council.
Ki bru wa chemphang wa da klam ha kani ka sngi toh u Prof. V. N Alok, IIPA New Delhi, Prof. Sumarlin Umdor, Department of Economics, NEHU wa u Tornado G. Wanniang, Sr. Audit Officer & Core Faculty, Regional Training Institute (IA & AD), Shillong.
