U Deputy Commissioner ka West Jañtia Hills District hawa e yei klam hawa wai ya ka e sikai wa pynman ha Sohmynting ynne ka sngi, da ong u wa ka e sikai wa kam kani daw yarap bha ko ya i yoh i laa kiwa chimbynta heiwa daw e sikai hajrong ka phang Integrated Farming ya kawa da pynman da ka seiñ Society for Urban and Rural Empowerment (SURE) wei wa da kyrchaan poisa da ka Meghalaya State Skill Development Society kawa haap hapoh ka chnat Labour ka sorkar Meghalaya.
U Deputy Commissioner, u Garod LSN Dykes uwa man leh kam u kongsan ha kani ka yalang da ong u leh wa ka sorkar da yaleh ko wow wanrah ya ki e sikai ha ki chnong wow pynsuk ya ki warep, deiwa kyntu leh ya kiwa chah hikai wow pynemkaam hok yeiwa da yoh ki. Da ong chooh chooh u wa ki paaid palatsor toh u ksoh-kti lang ki khnang wow ye u yoh yarap na ka sorkar.
Da e nongmuna u leh wa kani ka e sikai toh u em i krehlang wa ki SHG kiwa kreh ya ki kaam kiwa boon khamtam ki kaam rep hadooh ki kaam ri mrad. Da ong u wa ki Producers Group kiwa em ha ka chnong kiwa kreh toh ki kaam psan sniang, wow rep jhoor wa kiwi kiwi u yoh yarap bha ki na kam kani ka rukom e sikai chaphang ka Integrated Farming.
Ha kani ka sngi da yoh i klam na u Lephing Pyrtuh uwa man leh u Waheh Chnong yong ka chnong Sohmynting uwa da e leh ya ka bui ha u DC ya i rukom krehkaam ka VNRMC kawa da leh chiboon ki kaam ha kani ka chnong wow pynneh pynsah ya ka rymaw wei kær soodong.
U Lambormi Suchen uwa man leh u Skill Development Officer yong ka West Jañtia Hills da pynche u wa kani ka e sikai toh neibynta ka Skill Mission heiwa ka thong yong ka toh wow e sikai ya ki chi lak ngut kiwa chong chnong ha ki san snem. Da ong u leh wa ha uni u snem ka thong wow e sikai man ko arphaw hajar ngut kiwa chong chnong chwa wow kut u snem.
Neiliang u Dr. H.H. Mohrmen da e u ya ki kyntien waiphang deiwa yooluti u wa ki warep hadien wa da chah hikai ki daw ye ki u pynjanai ya ki rukom psan mrad wei kamjooh wow chna sboh wow chna baam sniang deiwa pynemkaam ya ki jhep wa ki mar rep kiwa pyut.
Kiwi kiwa da e i klam ha kani ka sngi toh u Mynjur Lyngdoh Pyrtuh uwa man leh u Secretary yong ka chnong Sohmynting.
Kam wow kdaw heini, kani ka e sikai ka SURE hajrong ka Integrated Farming toh kawa da pynman nyngkong ha ka chnong Ialong.
