Ka Chief Secretary wa thymme yong ka jylla, ka Rebecca Vanessa Suchiang da pynsñiaw ko ya i thrang wow em ki khynroo khyllood Khasi ki wow yakhun ya ki Exam Civil Service, deiwa kyntu ya ki khynroo khyllood wow mih chakhmat ha ka Exam Civil Service, heiwa da ong leh wa katni la phra snem ym em de kiwa na ka jylla kiwa pyndep ya katai ka Exam, hadien ka Isawanda Laloo kawa da pyndep ha u snem 2013.
Ka Suchiang kawa man ka kynthai wa nyngkong napoh ka jylla wow poi hadooh kani ka kyrdan, da ong ko wa da i em ha ka chuki sahep wa heh dooh ka jylla, daw ye ko wow man kam ka nongmuna ya kiwi wow bood ki, yow thrang ki wow yakhun ya ka Civil Service exam, heiwa da ong ko leh wa ym toh iwa eh tangwa emkaam wow kreh chitom.
Chooh chooh da ong ko wa ka sorkar ka da chimkhia ko wow pynchlur ya ki khynroo khyllood wow yakhun ya ki Exam deiwa booh leh neibynta uni u snem yei thaw e sikai namo ka Coaching Center ha MATI heiwa da e sikai hadooh 110 ngut wei da pynsñiaw ko yei kyrmen wa katai ka thaw daw pynmih ko ya ki sahep ha uni u snem.
