Shillong: Ynne ka 15 tarik heipor 12:30 pyrdi synyaw da em ki damok wa pakhot Petrol Bomb ya ka yungkrehkaam u Range Forest Officer, Mairang (WKH). Da iñ ka dwar phrang waka pyrda.
Ha ka 14 tarik won heipor 3:20 i step ka dukan dai Mobile Phone wa tip kam ka Mobile Centre ka yong u Larsing M Sawian wa em ha Police Bazar, Shillong da chah tooh ki mobile phone wa boon wa chongdor T.17,50,000 kamjooh waka poisa T. 1,50,000.
Ha ka 14 tarik biang heipor 6 waje i miet da chah thang kawi ka Jeetoo Mahindra Auto Truck wa em ya u number ML-05P-0122 ka yong u Basant Roy ha Mawiongrim, Shillong. Kani ka kari da iñ ko malu mala.
Ha ka 13 tarik won heipor 4:30 i step ka wi ka truck wa em ya u number WB-37C-9705 wa yah da u Robin Yadav da noh ko cha synrang wa em ha Ratacherra. Uwa yarap yah kari u Ranjit Kumar Yadav da khlaad u ha ini i thaw, katwa u Robin Yadav da mynsoo u wei da rah ya oo cha Civil Hospital, Shillong wei oo leh da khlaad u ha ka 14 tarik.
Ha ka 11 tarik u Inspector Vivekanand Kumar, Coy. Commander, E Coy, 75 Bn BSF, Purakhasia BOP (WGH), da ujor FIR u wa heipro 8:25 i step ki chipai BSF wa sylli yei bynta ka Kochu A’dokgre BIOP da chem ki ya ki 20-25 ngut ki bru wa yahkhmat da u Nonshing Ch Sangma deilang wa 22-25 tylli ki masi
Hadien ini da yoo ki wa em ar ngut ki bru wa lai cha u pood waka Bangladesh deilang wa 4-5 tylli ki masi. Hadien wa phah sangeh ya kini ki bru da sdang ki u pakhot mo ya ki chipai ka BSF wei uwi na ki dkhot ka BSF u Girdhari Lal Yadav da chah dat u ha u Nonshing Ch. Sangma.
Ki BSF da pakhot ki da u ‘Stun Grenade’ yow yut kini ki bru na ini i thaw wei da yut lang ki wa ki masi.
Ha ka 10 tarik u Md. Aminur Islam da ujor FIR u wa em uwi u bru wa ym tipmit u da wan u cha ka thaw kset kari u wa em ha Baghmara, South Garo Hills uwa ong wa kwah u thied ya ka thuk thuk TVS yong oo.
Uni u bru da sai u ya kani ka thuk thuk deiwa ong wa yah u ka khajik yow tip kawa dang miat wei ym em de wan pynuiñ u ka.
Discussion about this post