Shillong: Ha ka 17 tarik uni u bnai heipor kamwa 9:30 i miet, da chem ya i metyap yong u Kutstarjo Mawlong (19 snem) wa chah siat u na kpoh hajan ka chnong Jamynthlen, Krang hapoh Sohiong Out Post wei da suba wada chah siat u ha u Arbit Kurbah hadien wa wan pyndem u ha ki pulit.
U H. Passah uwa man leh kam u Mines Royalty Inspector, Directorate of Mineral Resources (DMR), Meghalaya da ujor u wa ha ka 17 tarik heipor 2:00 waje i step, so tylli ki truck wa em u No. ML-10B-1287, ML-04A-0337, AS-01R-3557 & AS-01FC-5057 da yut ki na DMR Check Gate kawa em ha Byrnihat khlem su ya ka dan.
U Rishikanta Singh, uwa yah ya ka truck (AS-01-EC-3771) da ujor u wa ha ka 14 tarik heipor kamwa 8:00 waje i miet, kawi ka Maruti Car (ML-10-8477) da tyrrah ko ya ka truck u nadien ha Diengpasoh Shillong By-pass Road (EKH). Hadien ini da mih san ngut ki bru napoh kari kiwa da lute oo uni uwa yah wa 4 synduk ki mar wa kit kani ka truck.
Kawi ka khynnah na West Garo Hills da chah rahbor wei da chah slaitbor ko hadooh le sngi ha u Ashadur Sheikh wei katkam ka ujor kani ka khynnah da ong ko wa ha ka 31 Wisu heipor kamwa 9 waje i step u Ashadur Sheikh da rahbor u ka cha Nayagaon, Tilapara, Bhaitbari wa cha Hajirhat heiwa da chah slaitbor ko hadooh le sngi.
Katkam ka yutip wa da yoh na ki pulit da ong wa u Ogin D Sangma, uwa man kam nu Waheh Chnong ka Shallang-B (WKH) da booh u ya ya ka ujor ha ki pulit.
Ha ka ujor da ong u wa ha ka 17 tarik heipor kamwa 4:00 waje janmiet ki dkhot pulit yong ka SF-10 wa tip kam u Hav. Johnas Maring, u Jerlin Makri, u Eddie Fennal Marwein wa u Tengrak Momin hadien wa da mu-aid ki da pynawri ki ha ka yaaw Shallang Bazar (WKH) wei da maham ki leh ya ki paidbah.
Ha iwi won i jia ha ka 13 tarik uni u bnai heipor kamwa 4:45 i janmiet u Banteibor Jyrwa (22 snem) da haap u na ka mala wa san yong ka Synod College, Shillong heipor wa dang ñiaam rong u.
Da pynkit ya oo bran bran cha Dr. H. Gordon Robert Hospital, Jaiaw, Shillong heiwa da ong wa da khlaad u.
Discussion about this post