Da: U W.Passah, Ex-HOD Electronics, St. Edmund’s College
Dang nachwa dang tynde heipor wa em du ki kari Petrol itæ ha ki snem 1950, waroh ha ka sngi Musiang da jooh lai cha yaaw du wow syu yei phñiang Petrol. I sma toh iwa bih bha wa dang em katæ ka Lead Petrol tæ rap khlan bha i sma. I tdem won wa pynmih toh ka Carbon Monoxide wa rap sih bar yaka Carbon Dioxide. Ka Carbon Dioxide rap sma ko tangwa rap duna i khor bar yaka Carbon Monoxide.
Ki ri ha kylleiñ ka pyrthai da rap husiar ki yei chait i khiah kamtæ da mih katæ ka aiñ wow chna Engine kari deiwa bood ya ka kyndon wa tip kam ka Euro Norms wei ha India won ka Bharat Stage Emission Norms. I thmu toh waw pynkylla ya ka Carbon Monoxide cha ka Carbon Dioxide wei yow ye u leh yeini da booh ya ka Catalytic Converter (CC) ha u Silencer Column ha ar liang. Ini toh yow pynkylla kamwa da khana tangwa ka Petrol wa em Lead (sisa) daw pynsih ko ya ka CC.
Toh neini i daw wa hap pynemkaam noh da ka Unleaded Petrol kawa mut ka wym em de ya u Lead.
Wow krehkaam kani ka Unleaded Petrol, emkaam heithaw ka Carburettor wow leh noh da ka MPFI næ Multi Point Fuel Injection Engine. Ha ki ri wa maya wei burom ya kiwa thied kari, booh Guarantee ki ya ki CC. Em wa Guarantee 2,00,000 Km ya ka CC. Na ini i daw wa ha kiwi ki ri lada em wa khura yu u Odometer deiwa looid ya u Cable, utu u Mechanic chah deiñ kuna u da iwa heh.
Lada jia Fail ya ka Pollution Test. Ki tre kari pynyoo ki ha ka Company wa ileh lada ym palat 2 lak Km da kut i krehkaam u CC tangwa lada kut i por daw hap thied da uwa thymme.
Ym tip de kammon leh ki ha India kopsar ym em wa bood aiñ. Sa ini wadep da booh aiñ ki ha Delhi wa ya Diesel Engine hadien 12 snem daw hap noh noh wei ya ka Petrol won 15 snem toh i wym chong aiñ heiwon heiwon leh.
Ka nongmuna toh hawa em ki bei ki pa wa thied kari yow lai kreh wei lai booh skur ya ki khon wei lai ki hapoh 60 Km chi sngi, kiwa kamai Tourist won lai ki 350 Km chi sngi, kamtæ 15 snem ki kari wa pynemkaam samen wa ki kari kamai ym yahaap de kamwa lehbeiñ ya ki kari ki bru samen.
Poi cha ki kari Electric namo kiwa pynemkaam da i bordiñ. Heipor wa thied u Conrad Sangma ya ka e-Vehicle (mutdur kawa 80 Horse Power), da kyntu u ya waroh wow thied yow lait i tdem Carbon Dioxide na Petrol Engine neitæ won ka 10 PPM na i Diesel kawa rap sih heipor rin mynsien.
Ym e u sñiawthooh kammon kani ka MeECL wa toh i kaamram i yong ka wow sneiñ wow kroo chaphang ka Indian Electricity Act sleiñ hi-eh ko.
Yow sñiawthooh, 80 HP mut 80X750 Watt neibhah 746 Watt i bor bordiñ mut 1 Horse Power (HP). Itæ mut 80 HP toh 60 KiloWatt. Heipor wa paan pyndait bordiñ hadien wa da dep chna yung, ka MeECL da e bor ymtoh u palat 6 KW, itæ leh hap riñ 2 Phase.
1 Phase mut ye i u pynemkaam 3 KiloWatt næ 3000 Watt. Ka Washing Machine 1500 Watt, ka Fridge 700 Watt, Heater Coil 1500 Watt iwa mut du kini leh 3700 Watt iwa mut da tam chwa.
Ini mut wa 60 KW ymhoi u Charge ha Domestic Line. Neibhah itæ, u Union Minister ka Road & Transport, u Nitin Gadkari u chna u kamwa 28,000 tylli ki Charging Station ha kylleiñ ka ri India tangwa ym pu em ha Meghalaya.
Mutdur lada pynemkaam da ka Diesel Generator itæ leh nang sih neibhah ka Diesel pynmih tdem ko Particle Per Million (PPM) 10 wa ktah bha ya u bru wa riñ mynsien.
Ha Delhi leh dang chem chitom neibhah kiwa yah kari ym yoh Charging Station wei ki khubor wa kop diñ ki Battery leh kiwa boon.
Wei ym poi pyrkhat i wa hei thmu wow pynduna i pynjakhlia ya ka la-ær namo ka Air Pollution yow wiar ka Carbon Dioxide, manda Charge yei Battery kari hei miet, ka NTPC pynmih bordiñ ko lyngba ki Thermal Power Plant kiwa thang da u mooyong.
Ha Switzerland won khana ki lok wa 4 kynta u Charge yei Battery ki kari khian kat ka Alto K10 yow ye u lai 500 Km. Tangwa ym yoh u Charge hadooh 4 kynta wa boon kiwi kiwa yang. Na ini i daw da em Charging Station ha man ka 10 Km ha waroh ki surok. I dor Charging won khana ki toh iwa duna bha (chiteiñ i dor wa lut nei Petrol) wei ha Denmark yei bordiñ won toh iwa pynmih dei bor ka la-ær namo Wind Power.
U heh ka UNO da jooh kyrpaad u ya u Prime Minister, Narendra Modi waw pynheh ya ki Solar wa Wind Project ha India khamtam ha South India wa jan bha cha u Equator kiwa yoh ar kynta tam i che ka sngi. Neitæ na West Bengal cha Gujrat kiwa em hajan duriaw kiwa ye wow booh da ki Windmill.
Sñiawsih wym em i jhan wow yaleh yow pyndooh ya ka Global Warming iwa katni u António Guterres, Secretary General ka United Nations da khut u ka kam ka Global Boiling.
Discussion about this post