Ynne ka sngi u Deputy Commissioner ka West Jaiñtia Hills, u Garod LSN Dykes da khut yalang u ya ki sahep ka NHAI wa ki seiñbhalang ka Ri-loom Jaiñtia kam ka JSM, ka All Jaiñtia Commercial Vehicle Association (AJCVA) wa kiwa kitkaam chnong ka Ialong wow yaklam pynbait heiyatoh wa i rukom su bai lai ha ka Tollgate kawa em ha u sarokbah NH-06 ha Ialong, West Jaiñtia Hills.
Ha ka yalang da yaklam hajrong i dor yong ka dan wa da khrong ha ka Tollgate heiwa da mih i khñium wa da syad ka bai dan iwa da ktah joor ya ki tre kari khamtam ki kari kamai.
Kani ka yalang da khut kyrpang khamtam hadien wa da pynku ya ka dan na ka T. 30 cha ka T. 60 kam ka kuna ya ki kari wym em FASTag.
Neiliang ki sahep ka NHAI da ong ki wa ka dan wa khrong ha kani ka Tollgate man ko kawa khian bha wei ini da wanrah i ya i dooh wa khroo.
Da ong ki wa na ki 6,000 tylli ki kari wa lai luti lyngba kani ka Tollgate, da em du kamwa 1,000 tylli kiwa su dan iwa da wanrah yei pyrchah da ki seiñ kiwa em ha ka yalang.
Hadien wa kut ka yalang da rai wa ka NHAi toh u tip tre ko ya i daw wa liat ka poisa na kani ka thaw, wei wow pynchlur ya ki paidbah wow leh FASTag ki neibhah katkam wa man katni dang duna bha kiwa leh ya ka hapoh ka District khamtam ki kari kamai.
Hawa yaklam wa u Ribok Biam uwa man u President ka JSM Western Region, manda kut ka yalang da ong u wa ka yalang ym em u ye u rai iwon iwon leh heiwa ki da dawa ki wa ki kari (kamai wa kari samen) napoh Ri-loom Jaiñtia ymtoh u khrong dan ya ki ha kani ka thaw kamwa man cha kiwi ki District (wa da pynlait ya ki kari tre District).
Da kyntu u ya ki paidbah wow man kiwa yakrehlang wa ka seiñ ha ini i kaam wei da pyntip u wa ki seiñ da rai ki wa waroh ki kari kamai wa ki kari samen wow dam noh u su ya ka dan ha kani ka Tollgate kat wympu pynbait ya i kaam.
Neiliang u Paila Lyngkot uwa man u President ka AJCVA da ong u wa ka yalang ynne ym em man ko kawa lai bait deiwa pyntip wa waroh ki kari na Ri-loom Jaiñtia ym emkaam de wow su ya ka dan ha kani ka Tollgate neibhah lada cha kiwi ki chong ym emkaam wow su weileh hapoh West Jaiñtia hap su ki ya ka dan kam kani.
