Ka lehkmen Republic Day kamwa jooh man man-u-snem daw lehkmen ya ka ha waroh kawi ka ri heiwa ya ka lama ka ri da pynhær da ki Montri Rangbah, ki Montri sorkar wa kiwi de tangwa neidaw wa da em ka Election kamjooh da krehkaam ka Model Code of Conduct hapoh ka jylla Meghalaya, ym ye wow leh yeini.
Kamtæ ya ka lehkmen Republic Day mynstep ha Shillong daw pynhær ya ka lama da u Lat ka jylla u Brig (Retd) Dr. B D Mishra kamjooh daw chim u leh ya ka salam.
Ha kiwi won ki thaw kam ha ki District, ki Sub-Division wa ki Block daw wan wow pynhær ya ka lama ka ri da ki DC, ki SDO wa ki BDO.
Ha Jowai ka lehkmen Republic Day daw sdang ko nadooh 8:30 i step ha madan Jrisaleiñ wei daw em leh ka March Pass, ki kari sorkar wa da pynraim da jar jiar ki chnat yow pynyoo ya ki kaam wa kreh ki, ki rwai, ki chaad wa kiwi kiwi de.
Daw lai saam baam leh cha ki thaw ri khynnah wei daw pynkut leh ya ka Republic Day Cup ha Kiang Nangbah Stadium.
Neibynta mynstep ka sngi ym em khang wow pynhær ya ka lama ha ki yung ki bru nadooh wa mih sngi hadooh wa sep sngi wei toh u pynhær da kawa miat dur wei kawa biang.
