Jowai: U montri rangbah ka jylla u Conrad K Sangma da phah u ya ka khubor sñiawlem hadien i khlaad u Most Reverend, Archbishop Dominic Jala, u Archbishop ka Shillong Archdiocese uwa da man kam u phader la 41 snem wa kam u Archbishop da jan dap arphaw snem.
U Conrad da ong u wa u Archbishop kam u bru Blai toh uwa yah na khmat da i mynsien maya bru wei man u leh uwa yajan wa u pa yong oo kamjooh wa i yung i sem wa u lok wa yajan manda jia iwa sñiawsih ha yung ha sem yong ki. Wei man u leh u bru wa stat wa chemphang uwa yah luti ya oo ha kiwa boon ki kaam wa yatoh wa i emkaam ki paidbah. Man u leh u bru wa burom da waroh ki bru na waroh ki niam wei deiwa dooh noh ya oo waroh kiwa tipmit oo da sñiaw ki yei dooh ha kylleiñ ka pyrthai.
“Ha ini i por wa sñiawsih, nga neibynta ki paidbah waka sorkar Meghalaya phah O ya i mynsien sñiawlem cha kiwa ha yung ha sem u Archbishop waka Shillong Archdiocese wa cha ki lok ki jor yong oo wa u Blai u e u ya ki i bor ha kam ini i por wa sñiawsih.”
Neiliang u montri rangbah warim ka jylla u Dr. DD Lapang da pynsñiaw u yei sñiawsih yei dooh noh ya u Archbishop Dominic Jala uwa da kreh neibynta ki paidbah lyngba u Jesus Christ .
“Nga tip O ya oo kam u phader wa em i mynsien wa maya, wei i khlaad u da man ko i dooh wa joor ya ki Balang wa ki paidbah, nga phah O leh ya ka khubor sñaiwlem cha kiwa ha yung ha sem u Archbishop Jala wa u Blai kynrad u e u yei chongsuk yei mynsien wa junom”.
Neiliang uwa yahkhmat ka liang pyrchah, u Mukul Sangma da pynsñiaw u leh ya i sñiawsih wei da phah u ya ki ktien sñiawlem cha kiwa ha yung ha sem u Archbishop yow ye u em i bor ha kam ini i por.
U MLA ka Mairang u Metbah Lyngdoh leh da phah u ya ki ktien sñaiwlem kamjooh u montri ka chait ka khiah u AL Hek.
Discussion about this post