Jowai : Ka Ri-loom Jaiñtia man ko kawa da kyrkhu sakhiat ka rymaw nadooh ki khloo ki kjam, ki sim ki doh wa kiwi kiwi khamtam ki krem kiwa da wandur da ki da ki phaw lak snem nachwa kiwa man leh kiwi na kiwa jrong tam ha pyrthai kiwa da chem hadooh katni.
Kini ki krem ha Ri-loom Jaiñtia kiwa jrong tam kynthup ki leh ya ka Krem Liat Prah, ka Krem Kotsati – Umlawan, ka Krem Tyngheng Dieñjem, kiwa jrong da ki phaw kilometer wa kiwi kiwi.
Lada jia ryngkat wa lai luti phi lyngba u Sarokbah NH 44 manda poi phi ha ka chnong Loomshnong ye phi u lai psiah ha ki ar tylli ki krem kiwa kynthup ya ka Krem Kotsati wa ka krem Umlawan, kini ki artylli ki krem da man ki iwi don hadien wada chem kiwa psiah wa yachem lang ki wei jrong ki kamwa 21,530 meter næ kamwa 21.5 kilometer.
Ka krem Kotsati toh ka krem katkam ka parom wa ong wa da em kawi ka bru kawa pyrtuid ka Sati kawa da haap najrong kani ka krem, neibhah kani ka thawpsiah cha ka krem man ko kam ka yung dorbar heh kam ki yung club wei em i bynta wa pai nakhlieh yongka wei kani ka bru da liat ko neini hadooh wa yap ko. Heijooh i por man ko ka krem kawa pynngad bha neidaw wa em ka um wa tooid nakhlieh yong ka.
Haap khlaad na yaw yow poi cha ka, wei da ker yeini i thlu wa piah na khlieh wei da chna leh ya ki rana wow psiah cha ka da ka tnat Border Area Development, wei kani ka thawpsiah cha ka krem man ko kawa yoosuk neibhah wa che ko hapoh neidaw wa em ini i piah na saad yong ka. Hatre ki rana em ka um kawa lang 24 kynta kawa pynemkaam ki bru u sait that wow sum wa kiwi kiwi.
Heijooh i por du kattu katni spah meter na kani ka krem em sa ka krem Umlawan kawa em ha ka Yaw Loomshnong.
Kani ka krem leh man ko kawa yoosuk wei kawa suk u psiah hadooh katni neibhah dang em ki dak rana wa da chna lyngba ka Border Area Development weiwa kini ki rana boon da man ki kiwa da chah tlep ha i khyndaw wada theh narood kani ka thawpsiah cha ka.
Weiwa da yoo wa ki rana man kiwa da dap sadu dei jhep wada noh da ki bru ha ini i thaw psiah cha ka krem Umlawan.
Heijooh i por da yoh u sakhi ya i khyndaw wa dap ha kani ka krem wada kit ka um hei lyuir na ki thawpsiah wa da noh yow khyndaw. Heijooh ipor da sakhi leh ya ki moo wa dang haap dang ha kini ki snem wada dep yeiwa da kynnoh wa ini da jia i neidaw wa pynpdung bom ki bru chajan yow tih moo ki.
Da em leh ka generator næ ka thaw pynmih bordiñ yow pynche ya ka luti psiah cha kani ka krem tangwa man ko kawa da sih kawa da sepai katni neidaw wym em de wa pynemkaam ya ka. Kani ka krem hei yaklam wa kiwa stat u psiah krem da ong wa ym neh slem de ko weiwa ye ko u wiar noh kattu neidaw wa boonjait.
Ka krem Kotsati wa ka krem Umlawan man ki jar jiar tangwa katkam ki stat psiah krem da ong wa yachem ki chirup chapoh. Iwi toh u tip wa ym ye u kynjoh lut ya i jrong kini ki krem iwa 21.5 kilometer ladym yoh yei chah sikai wa pliah wei ladym em ya ki kor ki bor katkam wa emkaam wow psiah cha ki.
Discussion about this post