Kam chibynta wow yaleh pyrchah yei dai drugs ha Shillong, neiliang ki pulit ka ANTF East Khasi Hills deilang wa ki pulit ka Rynjah wa Laitumkhrah Police Station hadien wa da tip tikna, da lai kem ki ya ar ngut kiwa dai drugs kitwa tip pyrtuid kam u Eldikinstar Sohtun wa u T. James Seiminthang hei janmiet ka 15 tarik uni u bnai na Nongshiliang wa dang haap hapoh ka Rynjah PS.
Kamtæ na kini ki ar ngut da yoh wow kem 40 tylli ki khieh sabon wa em Heroin wa khia 423.09 gms wei da yoh leh wow kem ar tylli ki Mobile Phone, kawi ka thuk-thuk wa em Number ML-05R-5271, kawi ka PAN Card wa kawi ka EPIC.
Ya kini da pynngat hapoh ka aiñ NDPS Act wei ya ka takit da pynman da ka Rynjah Police Station.
Hadien wa da takit ya kini ki ar ngut, ynne ka sngi hei yahkhmat u Eldikinstar Sohtun da yoh leh wow kem na yung u wa em ha Mawpat ya kawi ka Revolver wa da chna hi, kawi ka Air Gun, 7 tylli ki kuli 0.22 mm, 6 tylli ki kuli .38 mm wa uwi u kuli wa da dep siat wa 5 tylli ki kuli 12 Bore.
Da kem leh ya kawi ka Mobile Phone, ka poisa wa T. 2 lak, ar tylli ki kari Mahindra Thar, kawi ka Maruti Zen, kawi ka Maruti 800 wa kawi ka Chevrolet Beat.
