Khliehriat: U District Magistrate, East Jaintia Hills District da pynbna paidbah u yaki kyndon namo ki Standard Operating Procedure (SOP) heiyatoh i chalan mar hapyrdi ka India wa Bangladesh.
Hapoh kani ka Standard Operating Procedure (SOP), waroh kiwa khayi namo ki Importer/Exporter hap ki wow pyntip chwa cha u DC ya waroh ki kari wa daw pynemkaam ki wow kit mar cha lane na Bangladesh deiwa e lang yaka Registration Number ki kari, i pyrtuid kiwa yah kari kamjooh leh ya i Mobile Number kiwa yah kari. U Deputy Commissioner daw khut yalang u yow pyntip hadooh katwon tylli ki kari wa ye u lai ha chi sngi. Toh u em du uwi wa yah kari wei hap u wow deiñ Mask wei wow man uwa lehkhooid.
Yaki kot ki sla toh u pynkhooid yaki wei lada ye wow phah chwa ya ki Soft Copy. Wei heipor wa thap tiar wow pyntikna leh wa bood yaki kyndon ka Social Distancing. Haka yit kari hap wow biah leh yei pyrtuid ki Importer, ki jait mar wa kit, hadooh katwon wa kit wei ka luti wa lai.
Ki kari ym toh wow sangeh ki ha chiteiñ luti wei toh u song chwa yei baam. Uwa yah kari daw leh Screening chwa wow psiah biang u chapoh India da ki wakreh ka chnat i chait i khiah wei yaka kari leh daw siat dawai chwa wow psiah biang chapoh India. Ya kiwa yah kari daw Test yaki man ka 10 sngi daka Health and family Welfare Department, Government of Meghalaya. Ki Importer toh u pyntikna ki wa kiwa yahkari u lai ki du nei thaw sah sak cha thaw kreh ym toh u chah u lai ki cha kiwi ki thaw.
