Kam chibynta wow pynkyllooid ya ki kyndon wow kdoh u khoom yow yaleh pyrchah ya ka khlam COVID-19 hapoh ka jylla, ka DC ka East Khasi Hills da pynmih hukum ko yow pynbna ya ki kyndon hawa wai ya ki thaw ah sñiooh (Saloon/Beauty Palour) hapoh ka District heiwa ka hukum wow chah u wai da pynmih ha ka 10 tarik uni u bnai.
Ki kyndon toh wym chah ya ki wakreh wa iñdoh, kiwa em ky’oh, kiwa kjut u ch’oh wow wan kreh ki wei toh u lai phah Test ki. Kiwa wan kreh won toh u deiñ Mask da ki N-95 lane ar tylli ki Mask khlem pep.
Toh u pynbiang ya ki thaw saitkti kamjooh ki Sanitizer wei wow booh bru yow pyntikna wa bood ya ka Social Distancing.
Ki kaam wa chah toh du wow ah sñiooh donhi wa i khi tmaaiñ wei kini waroh ym toh u chimpor ki palat 15-20 minit. Kiwi kiwa chimpor palat ya ini ym toh wow leh ya ki.
Ym chah wow ya khublei kti, u ya kdung. Waroh ki tiar wa pynemkaam toh u sait khooid bha ki wei ya ki Blade toh u pynemkaam da kiwa thymme katwa ki that wow kyrchah ya ki bru toh da kiwa pynemkaam chisien donhi. Wei i lutsan wow leh ya ini ye wow phah su ha ki bru.
Ki wakreh toh u chim ki yei tika yow yada ya idæ wei hap leh wow booh ya ki dak VACCINATED lane NOT VACCINATED ha ka dukan.
Ki thaw ah sñiooh toh u man ki kiwa pynngaad wei toh u sait khooid ha chwa wow wai wei hadien wa khang katwa ya ki bynta i dukan wa khlan ki bru wow tba toh u pynkhooid man ka chi kynta lane ar kynta.
Toh u booh da ka pali (Token System) ya ki bru yow lait u khynnia ka dukan wei lada ye toh u leh da ka Cashless Transaction.
I rukom noh jhep toh katkam ki kyndon ka CPCB, ym chah wow noh roi hapoh dukan, ym chah leh wow dih sikret, u baam kwai hapoh dukan.
I thaw psiah wa i thaw mih toh u em ki jar jiar lada ye.
Kiwon kiwon kiwa leh pyrchah daw chah khang i dukan.
