Ka Meghalaya State Coordination Committee of the Coal Owners, Miners, Exporters, Transporters and Dealers Forum (MSCCCOETDF) da rai ko wow pynman da ki yalang paidbah yow pynbor ya ka sorkar wow pyndam noh ko ya ki kyndon namo ki Standard Operating Procedure (SOP) kiwa hap wow bood yow ye u yoh Prospecting License wa Mining Lease neibynta u tih mooyong hapoh ka jylla.
U Executive Member kani ka Forum, u Reginald Shylla da ong u wa da rai ki wow leh yeini hadien wa dadep e dorkhat cha u Montri Rangbah, u Conrad K Sangma ha ka 2 tarik uni u bnai.
Yow pynche chaphang kini ki SOP wa da pynbna da ka sorkar, daw lai pynman yalang ha ki thaw wa em mooyong hapoh ka jylla heiwa u Reginald da ong u wa kini ki kyndon ka sorkar jylla wa da pynmih ha ka 05-03-21 man ko pyrchah ya ka aiñ Mining and Minerals (Development and Regulation) Act, 1957 heiwa ki kyndon wa da pynmih da man ko palat yei bor ka sorkar.
Ka kyndon wa chem chitom dooh kiwa khih mooyong toh wa emkaam yei thaw wym duna 100 Hectare i heh yow ye u lai paan Prospecting License chwa wow ye u yoh ya ka Mining Lease.
Kamtæ da ong ko pyn nawa sdang da dooh u tih mooyong neibhah ym em ki bru ka jylla wa em hadooh 100 Hectare i thaw wei ini da yoo lakam da chna kyndon du neibynta ki heh spah neibhah wot hapoh ka Mineral Concession Rules, 2016 deilang kiwa da pynkylla ka ha u snem 2017, 2018, 2019, 2020 wa 2021 ym em kam katæ ka kyndon wa ong emkaam 100 Hectare yow ye u tih mooyong.
Da pyntip u leh wa da lai rah yeini hakhmat ka High Court ka Meghalaya neibhah haka aiñ MMDR Act 1957 da ong ko wa emkaam du 4 Hectare i thaw yow ye u yaleh Prospecting License, tangwa ka sorkar ymtip neiwon sai ko da ka 100 Hectare.
Da ong u wa ini wa leh ka sorkar toh du wow pyndooh yei hok kiwa khian wa nai wei wow pynmyntoi du ya kiwa heh spah wei man ko leh pyrchah ya ka aiñ.
Discussion about this post