Jowai: Chwa wow poi ka sngi lehkmen laitlooid ka ri namo ka Independence Day, ka Ministry of Home Affairs da hukum ko ya ki Chief Secretary/Administrator ki sorkar jylla/UT Administration, Secretary yong waroh ki Ministry/Department ka sorkar India wow bood ki ya ki kyndon wa em hapoh ka ‘Flag Code of India, 2002’ wa ka ‘The Prevention of Insults to National Honour Act, 1971’.
Ha kani ka hukum namo ka Advisory da ong ko wa ka lama ka ri (National Flag) klam ko yei thrang wei angnood ki paidbah ka ri katwa kamtæ emkaam wow burom.
Da ong wa em i maya wa i burom wa i mynsien chakri ya ka lama ka ri, tangwa neidaw wa duna i pynche wa i pynsñiawthooh paidbah dang em wa ki tnat sorkar dang bakla ki khamtam wow booh namo pynhær ya ka lama.
Kamtæ kani ka Advisory da phah ko wow pynman ya ka Mass Awareness Programme wow pynche wei wow pynsñiawthooh paidbah hajrong kini ki aiñ.
Chooh da ong wa heipor ki sngi kyrpang da pynemkaam da ki lama plastic heithaw da ki kot nei neidaw wa ki lama plastic ym man ki kiwa pyud kam ki kot, wei ini i chimpor ki wow pyud da pynhiar dor i ya ka lama.
Kani ka Advisory da kyntu ko leh wa ha ki sngi kyrpang kam ki chuti, ki lehke sport wa kiwi kiwi toh u pynemkaam du da ki lama kot katkam ki kyndon ka ‘Flag Code of India, 2002’ wei ymtoh wow brait taroi ya ki cha khyndaw namo kat chawa yoh.
Ya ki kyndon ka aiñ ‘The Prevention of Insults to National Honour Act, 1971’ wa ka ‘Flag Code of India, 2002’ kiwa yatoh wa ka lama ye u yoh na ka website ka MHA (www.mha.nic.in) heni u link https://mha.gov.in/sites/default/files/nationalFlagEmblemAnthemEng_06082018_0.pdf
Discussion about this post