Khliehriat: U Deputy Commissioner, East Jaiñtia Hills District da pyntip u wa ka sorkar jylla da chah biang ko wow wai ki Cyber Cafe nadooh ka 20 Naisaphra uni u snem deiwa bood ya ki kyndon wa da booh ka sorkar.
Neiliang u DC da booh u leh ya ki Standard Operating Procedure(SOP) wow sdang wai biang ki Cyber Cafe hapoh ka District heiwa waroh kini ki Cyber Cafe kiwa da Register wa ka yung krehkaam u Deputy Commissioner u wai ki katkam ki sngi wa i por wa da booh ka yung krehkaam yong oo.
Chooh chooh ki tre namo kiwa pynlai ya kini ki Cyber Cafe toh u pyntip ki ya ki Waheh Chnong, Dolloi heiyatoh wa i por wow wai ki, wow pynjngai ya ki bru iwi na iwi kamwa 6 feet katkam i thaw wa heh i dukan khnang wow lait nei khynñia.
Ymtoh wow chah ya ki bru hapoh ki Cyber Cafe kiwa khlem sap Mask ki wym tymmoh yei ktien wei khmut. Toh u booh ya ki Hand-sanitizer ha ki thaw psiah wei toh u pynkhooid ya ki tiar wa em hapoh Cyber Cafe kamwa le sien chi sngi.
Ymtoh u chim poisa khlem ki sap-kti, toh u booh leh ya ki thaw sait-kit wa i sabon, wei ki wakreh ha kini ki Cafe toh u sap Mask wei u sap-kti ki man i por.
Ki tre wa kiwa pynlai ya ki Cyber Cafe toh u bood ki ya ki kyndon wa da booh lym kamtæ daw pynchitom ya ki katkam ki kyndon ka aiñ.
