Khliehriat: Kam chibynta wow bood ya ki kyndon ka chnat i chait i khiah (Health and Family Welfare Department), neiliang u Deputy Commissioner, East Jaiñtia Hills da pynmih hukum u neibynta ki skur wa ki thaw puræ heiyatoh wa i rukom thap khynnah (Admission) cha ki Higher Secondary Schools neibynta u snem 2020-2021.
Neibynta ki thaw man sor (Urban Area), waroh ki Admission Forms/Prospectus toh u e Online wei toh u man ki mynkna katwa neibynta ki thaw palatsor (Rural Area), waroh ki Admission Forms/Prospectus toh u e lyngba ka Online wa Offline wei toh u man ki mynkna.
Hawa ekti ya ki Form (Submission) ye u leh Online wa Offline heiwa lyngba ka Online toh u leh mar ya yoh ya ki kot ki sla, katwa ka Offline Submission, ki thaw puræ toh u chimkti ki ya ki ha i dur wa ym khynñia deiwa pynduna ya kiwa wan ekti (ymtoh u em palat 200 ngut ha ka chi sngi) wei wow leh ya iwon iwon i kaam deiwa yabhah ya ki khynnah wa kiwi kiwi ki kyndon katkam wa da booh ka sorkar.
Chooh chooh heiyatoh wa i rukom su ya ka bai skur (Fees) ye u leh da ka Offline lada ki khynnah wan ki na ki thaw wa cha palat sor donhi, heiwa kani ka laad u man ko kawi na ki laad wow su ya kani ka bai skur. Toh u pdiang leh ya i su da ka poisa wa ki Cheque ha ki thaw wa da booh deiwa pynjngai iwi na iwi wa deiwa bood leh ya kiwi ki kyndon ka sorkar.
Neiliang u Deputy Commissioner da pyntip u leh wa ka bynta wa ar (Second Phase) yong ka Admission u sdang i nadooh ka 8 Naisaphra, deiwa bood ya ki kyndon wa da kdaw hajrong wei i rukom su ya ka bai skur toh u man i 7 sngi nadooh wa pynbna ya i pyrtuid kiwa yoh u psiah skur.
