Ka Supreme Court ka India da ong ko wa ki Lat namo ki Governor ym ye ki wow ksoh hi-eh ya ki Bill wa da phah cha ki lada ym e ki ya ka muhor wow pynman aiñ ki wei toh u pynuiñ smat ya kini ki Bill yow yohlaad ka sorkar wow pyrkhat deiwi.
Da ong wa ki Governor ymtoh kiwa da jied da ki paidbah yow man ki kam ki khlieh ka jylla tangwa da e bor ya ki wow leh yei kaam yong ki wei ini ym em kynthup i hadooh wow pynthut yei chna aiñ da ki sorkar jylla.
Da pynche leh wym em e bor ya ki Lat wow ksoh bait ki ya ki Bill khlem da booh por deiwa khlem em leh ki iyi iyi leh.
Ya kani ka hukum da pynmih hadien wa lai rah ka sorkar Punjab hakhmat ka Supreme Court pyrchah ya u Lat ka jylla, u Banwarilal Purohit uwa da ksoh ya ki Bill wa da phah cha oo da ka sorkar.
Kani ka hukum da man ko kawa emkaam neibhah kiwi ki jylla kam ka Tamil Nadu wa Kerala leh da lai ki cha ka yung bichaar neidaw wym leh ki Lat iyi iyi ya ki Bill wa da phah cha ki.
Ka Supreme Court da ong ko wa ki Lat ym ye ki wow ksoh hi-eh ya ki Bill neibhah man ko pyrchah yei krehkaam i synchaar paidbah heiwa da jied ya kiwa mihkhmat paidbah yow chna aiñ ki wei lada ksoh bait ya ki Bill da man ko mar dei khangtleiñ yei wa thoh hapoh ka riti synchaar ka ri neibhah da e bor leh ya ki sorkar jylla wow chna aiñ ki.
Katkam ka Article 200 u Lat ye u wow leh le jait hawa yatoh wa ki Bill, iwi toh wow e yaka muhor pynman aiñ, iwi won u ksoh ya ka Bill næ u phah cha ka President yow pyrkhat wei iwi won toh u pynuiñ ya ka Bill cha ka sorkar jylla deiwa khana iyi wa duna.
Kamtæ ka Supreme Court da ong ko wa lada u Lat rai u wow ksoh ya ka Bill katkam ka Article 200, hap u wow pynuiñ noh ya ka Bill neibhah ka Article 200 ym em e bor ko wow ksoh bait ya ka Bill wei ym em bor ko leh wow pynthut yei krehkaam ka sorkar jylla wow chna aiñ.
Discussion about this post