Ka Jaiñtia National Council (JNC) da ban joor ko yei dawa yong ka na ka sorkar Meghalaya wow chimkhia ko ya ki mat wa ktah ya ka jaitbru na Jaiñtia.
Neiliang u President ka seiñ, u Sambormi Lyngdoh da kyntu u wow pynkylla yei rukom krehkaam ka Jaiñtia Hills Autonomous District Council (JHADC), heiwa da ong u wa emkaam ko yei krehkaam wa laitlooid wei da ban u hajrong i wym khooid i rukom krehkaam ka Council.
Chooh chooh da ong wa ki MDC da man ki du kam kiwa bood ya u MLA wei man ki leh da kam ki Vote Bank yong ki MLA, wei ki MDC leh ym em ki iyi iyi i bahkhlieh.
Ka JNC da dawa ko leh wow tipmit ya i ktien Pnar khnang wow ye u yada wei wow pynneh yei rukom im wa kyrpang ki bru na Ri-loom Jaiñtia kamjooh leh wow kynthup ya i ktien Pnar ha ka Meghalaya State Anthem wa ka State Language Act.
Kiwi tawon ki mat wa da wanrah toh i rukom thung kreh ha ki karkhana pynmih khyndaw-bilat ha ka jylla wow yoh laad ki khynnah u yoh kreh.
Ka seiñ da dawa ko wow pynbait ya u pood hapyrdi ka Meghalaya wa Assam neibhah i em u pood wa paka daw khang nei chah kyntoor pood.
Da dawa leh wow e laad u tih mooyong da iwa khian namo ka Small Scale Mining yow yohlaad kiwa khian wow tih mooyong lang.
Neiliang ka JNC da kyntu ko ya ka sorkar wow chimkhia ya kini ki mat khnang wow myntoi ki paidbah na Ri-loom Jaiñtia liang wanang.
Ini waroh man ko leh kam chibynta ka Save Jaiñtia Mission wa da pynbna paidbah ka seiñ ynne ka sngi.
Discussion about this post