Ki MLA, MP emkaam wow ksoh ki yaka dustur wow chim jait na ka bei, i pynkylla daw pyndooh yei man kyrpang: Jambor War

U MDC na Mawthadraishan, u Jambor War da ong u wa kiwa yahkhmat deilang wa kiwa mihkhmat paidbah, la man kam ki MLA næ ki MP, da man iwa emkaam wa kam kiwa yahkhmat wow ksoh ki ya ka dustur riti wa i man kyrpang ha ka kheiñ khur kheiñ jait kawa yatoh katkam wa da yah nadooh warim deiwa chim yei jait ka bei.

U Jambor da klam u yeini ynne ka sngi kawa man ka sngi wa ar ka Dorbar Lyiur ka KHADC, hawa chimbynta wow kyrchaan ya ka phang namo ka Motion wa da wanrah da uwa yahkhmat ka Liang Pyrchah, u Titosstarwell Chyne, hajrong ka bynta yong ka KHADC hawa yatoh waka Khasi Social Custom of Lineage Act, 1997.

U MDC da ong u wa lada kam kiwa yahkhmat yahbakla ki ya kani ka dustur, daw pynbakla ki ya ka jaitbru waroh kawi.

U Jambor da ong chooh chooh u wa man iwa emkaam wow sikai ya ki paidbah wow ksoh skem ki ya ka dustur chim jiat na ka bei khnang wa ka jaitbru u neh u sah wei u im ko wei ym mih iwa bakla næ ka sang ka maa ha ka chongkha chongman.