U President ka Meghalaya Pradesh Congress Committee (MPCC), u Vincent H Pala da ong u wa daw chimpor hadooh 20 snem ya ka All India Trinamool Congress (AITC) wow soohthied wei wow ku ha ka jylla Meghalaya. Da ong u wa kiwi ki Party la da man ka NPP næ ka BJP da chimpor da ki phaw snem wow ye u soohthied wei ym man iwa suk wow lai cha ki paidbah.
Uwa yahkhmat ka Congress ha ka jylla da ong u wa i mih yong ki 12 ngut ki MLA ym em i ktah ya ka Congress neibhah wa da dep wow soohthied chwa hapoh ka jylla, katwa ki MLA wa mih wa lai psiah cha ka Party wa thymme ym pu yoh ko yei tipmit ki paidbah hapoh ka jylla. Da ong u wa kiwa yahkhmat ka Trinamool Conmgress lada stat næ lada em poisa katwon katwon leh daw chimpor ya ki wow pynsñiawthooh ya ki paidbah.
Da ong u wa ka NPP da chimpor wow soohthied wei ka BJP katni la 14-15 snem da ya pynkhlan bha, tangwa i yoh ya ki Vote ym pu poi cha ka 50% leh.
U Pala da ong u wa ki MLA na Garo Hills kiwa mih katni na ka Congress toh kiwa na ka jooh ka manyung, katwa ki 4 ngut ki MLA na Khasi-Jaiñtia kiwa mih ym tharai u jop de ki, deiwa ong wa ha Umroi kamwa 80% kiwa kyrchaan da em ki wa ka Congress, ha Nongthymmai wa Mawsynram leh kamwa 80% kiwa dang sah wa ka Congress, wei ha Sutnga-Saipung tang 5% leh ym em wa lai wa u MLA.
Da ong u leh wa ka Congress ym chah ktah ko neibhah wa i por dang biang ya ka Party wow pynthymme biang, wei ka Party ka da dep pynbiang chwa ko ya ki kyrtong neibhah wa da tip chwa wa daw em kiwa mih. Da ong u wa ka Congress katni da pyrchang ko wow sai ya ki kyrtong kiwa dang khynroo neibhah boon ki khynroo kiwa wan psiah cha ka Congress.
Ha iwi won i liang, u Pala da ong u wa ki paidbah ki tip ki wa i mih ki 12 ngut toh neidaw wa da yoo ki wa ka Congress ka em ko ha ka Liang Pyrchah wei da rap duna poisa, wei da lai ki cha ki Party kiwa tyrwa da ka poisa wow yaleh ya ka Election.
