U Working President ka United Democratic Party (UDP), u Paul Lyngdoh da ong u wa man iwa suk bha wow sdang hi-eh ya ka seiñ saiñpyrthai wow pynchongshit ya ki paidbah, tangwa hei khaddooh ki paidbah hap ki wow pait wa lada i ya rwai ya chaad ha sarok da yarap ko namo ym em.
Hawa kylli hajrong i yakhun pyrchah ya ka seiñ thymme, ka Voice of the People Party (VPP) kawa da jop tput ha ka Election MP kawa da pynman ha uni u snem, u Paul da ong u wa kawi ka Election phær ko na kawi won.
Da ong u wa ha ka MP Election phær ko chiboon neibhah ha ha katai ka Election joor bha i pyrchah ya ki seiñ saiñpyrthai kiwa em ha ka sorkar. Tangwa hadien kajiak bnai ka MP Election, ki paidbah da yoo ki iyi wa jia wei i por hi daw batai ko.
“Man iwa suk bha wow chna hi-eh ya ka seiñ saiñpyrthai wow pynchongchit ya ki paidbah. Hadien dadep rwai dadep ya chaad ha sarok, hawa khaddooh ki paidbah hap ki wow pait wa ki khon ki u yoh kreh ki neiwon, ka yoh ka kot kammon, i eh ha ka imlang sahlang, i eh nei drugs kammon u yakhun i. U yakhun i deiwa lai kbai ha sarok wei ya rwai ya chaad, itæ da yarap i? Ha ka saiñpyrthai emkaam ka pasoh wei lada ka pasoh ym em ko ha kawon kawon ka seiñ saiñpyrthai, man ko kawa eh bha wa ka seiñ u neh ko”, da ong u Paul uwa man leh kam u Montri ha ka sorkar.
Hawa yatoh wa ka Election MDC na Jaïaw Constituency kawa mihkhmat u katni, u Paul da ong u wa ka yaleh man ko kawa khroo wei ym man ko wa kiwi ki kyrtong tangwa ya idæ heiwa iyi wa ye u leh wei iyi wa duna wa iwa mih kattæ kiwa hap wow pynbha yow yoh yei jop.
“Ki paidbah ha ki kajiak bnai kattu da yoh ki wow yoo yei rong wa skhiat yong ki seiñ saiñpyrthai waphær waphær. Kani ymtoh ka Drama kawa neh le kynta, tangwa toh ka yaleh kawa neh boon snem”, da ong u wei da pynsñiaw u leh yei sñiaw skem wa u kyrtong ka UDP na Jaïaw daw yoh u yei jop.
Discussion about this post