Ynne ka sngi ha ka Dorbar Liyur wa chi sngi ka JHADC, u MDC ka VPP, u J. Pohtam da wanrah u ya ka Motion namo ka mat yaklam hajrong ka phang wa emkaam wow pynmiat ya ki yaaw ki haat ka District Council wa em ha sor wa ha palatsor.
U Pohtam da ong u wa i daw hi wa hiar ki yaaw wa i khayi pateiñ hapoh Ri-loom Jaiñtia toh neidaw wym em ki yaaw wa paka wei kamjooh leh i wym pynkrehkaam pura ya ka aiñ wa yatoh wa ki yaaw kawa nadooh u snem 1975.
Da ong u wa ki yaaw ka District Council kam ha Dawki da chah ieh khonswet ko neibhah wa em du kamwa 5 tylli donhi ki trep wei ki thaw chong leh wa dap sadu ki klong, i jhep wa kiwi de.
Chooh chooh da kdaw u wa ki yaaw ka JHADC wa wot ha Iawpynsiñ ym em ki luti kjat kamjooh ki paikhana deiwa ong wa emkaam wow chna ya ki yaaw wa thymme ha kylleiñ ka Ri-loom Jaiñtia kam ha Amlarem wa ha Jarain kawa da em ka yaaw tangwa da hap wow khang noh ya ka.
Ka MDC ka VPP, ka D. Tongper da kyrchaan ko ya ka Motion deiwa ong wa ka yaaw ha Umkiang toh kawa kyrchaan ya ki chnong khappood wei emkaam u pynmiat ya ka wei ymtoh wow dai lilam donhi ka Council ya ka.
U MDC ka Congress, u MB Rymbai da ong u wa emkaam u pynkhai im biang ya ka Iawmusiang heiwa u chna ya ka toh katkam wa da pynwandur nyngkong iwa 6 mala.
U MDC ka VPP, u G. Susngi da ong u wa ki yaaw man ki kiwa kongsan tam ym du wow pynim ya ki bru tangwa wot u yoh nong ka Council deiwa pynrap wa hawa boon hi ki yaaw ka Council leh yoh nong ko.
U Susngi da kdaw u leh wa katkam wa man katni em hadooh 737 tylli ki Permit dukan ha Iawthymme wei manda dep ka Iawmusiang daw mih 432 tylli ki dukan, iwa duna da 305 tylli heiwa da maham u wa emkaam wow pyrkhat bha hajrong ini waroh ya jia won i kaam wa sñiawsih hadien.
U MDC ka Congress, u R. Parien da ong u wa ki yaaw toh u man kiwa ku khnang wow yoh myntoi ki paidbah deiwa kdaw wa ka Council toh u pait ko leh ya ki yaaw kam ha Iooksi wow chna pynmiat ya ki.
U Executive Member wa pait ya ka Market, u S. Shadap da kubur u wa em chiboon i duna ha ki yaaw deiwa pynche wa katni ka Council duna poisa bha ko heiwa wot wow su tulop leh chem chitom ko.
Heiyatoh wa ka Iawpynsiñ kawa man yaaw ha ka Pynsiñ wa Khyllaw, da ong u wa da thoh cha ka sorkar wow yoh yarap na ka hajrong kani ka yaaw.
Da ong u leh wa da khut ya ki chnong wow wan chaphrang kam ka Phramer, Sahsniang, Pynsiñ (Rymbai) wa kiwi wow pynpsiah ki ha ka Council.
Heiyatoh wa ki yaaw ha Jarain wa Amlarem da pynche u wa em i kajia hapyrdi ki chnong ha kini ki thaw heiwa da kyntu u wow yakrehlang wa ki MDC ka thaaiñ War Jaiñtia wa u MLA wow pynbait noh ya ini i kaam.
Hajrong ka yaaw ha Umkiang da ong u wa daw chong pyrkhat wa ka Committee ka chnong wa pait ya ka yaaw.
U Shadap da pynche u leh wa ha Khanduli da emkaam yarap ko kamwa Rs. 50,000 wei da e yarap wow chna pynmiat ya ka yaaw ha kani ka chnong iwa pynyoo wa ka Council kreh hi ko yei kaam yong ka.
Hadien i yaklam yillu neiliang u Pohtam leh da pyndam noh u ya kani ka Motion.
Discussion about this post