Jowai: U montri rangbah ka jylla u Conrad K. Sangma, ynne ka sngi da ong u wa ka sorkar India da e ko yei chkoor yow ap yeiwa emkaam ka thaaiñ Northeast, iwa da wailaad yow wanrah yaka roi ka paar haka thaaiñ.
Hawa klam haka tamasa “The Meghalayan Age” Tourism Conclave ha Thadlaskein ynne ka sngi, kawa da wan wow embynta lang da ki bru kiwa em i bynta haka kaam uiñke suwari kamjooh ki sahep sorkar, u montri rangbah da ong u, “Ka Meghalayan Age toh i pyrchang daka sorkar wow e ya i laad ya kiwa wanke chapoh ka jylla yow maad ya iwa ka Meghalaya ye ko wow e.”
“Em i ka thong wa heh ya kani ka tamasa tangwa neidaw ki kyndon wa da booh da ka chnat i chait i khiah heiyatoh wa u Coronavirus, da hap wow pynkhian noh yaka tamasa deiwa khut du yaki bru wa emkti wow pynku ya i kaam uiñke suwari kam ki Media, Tour Operators, Bloggers wa kiwi kiwi ki wow pynpoor ya i parom ka jylla cha ka pyrthai.”
Hawa klam bniah yaka ‘Act East Policy’, u montri rangbah da baan joor u yei emkaam wow thooh ki laad wow ya khayi wa ki ri wa em chajan yow pynku yaka kaam uiñke suwari, yow wanrah i sñiawthooh yumut kamjooh ka khayi pateiñ.
“I kam ka sorkar sñiawthooh i ya ini wa ka Bangladesh toh ka ri kawa ku smat bha heiwa i heh i san ko da kynjoh i cha ka 8%, ka GDP ki man ko kamwa 400 Billion Dollars. Hap i wow pait ya ki kabu wa em pyn chajan wei u chna yei yatoh wa kani ka ri i wow myntoi ya ki bru yong i.”
Da ong u leh wa ka jylla yong i man ko kawa da kyrkhu daka rymaw wei kreh i wow pynkylla ya ini cha ka wow yoh myntoi ka wow wanrah yaka roi ka paar.
U Union MoS DoNER, u Dr. Jitendra Singh da ong u, “Ka Meghalayan Age toh ka tamasa kawa daw booh yaka jylla Meghalaya kam kawi na ki thaw wa pawnaam haka uiñke suwari.”
Da yaroh u leh ya u Prime Minister Narendra Modi, deiwa ong, “Ha kini ki 5 snem wa da lai, ka sorkar India da leh ko yow wanrah ya ki laad wow pynku yaka thaaiñ Northeast. Wei deiwa ya krehlang wa ki sorkar jylla kiwa em i thrang, i thong yong u Prime Minister daw mankaam i.”
U Dr. Singh da ong u wa hapoh i yahkhmat u Modi, ka mang poisa yaka Ministry of DoNER’s da ku ko ar chah. “Chwa wow em ka sorkar NDA, i mang poisa neibynta ka NEC toh kamwa T. 700 klur, tangwa katni da ku cha T. 1400 klur. Wei em i leh boon ki kaam wa daw pynkreh yow pynku yaka thaaiñ.”
Ha kini ki 10 sngi ka tamasa, u Brian Kharpran da yahke u ya kiwa chah khut sñiawbha yow psiah cha ki krem. U Kharpran, hawa e yei klam da pyntip u wa ha ki 20 snem da dep ki wow psiah wei chem ki palat 1700 tylli ki krem wei da chem luti ki la kamwa 514 km, hadooh wa chem ya ki jait wa im hapoh kini ki krem kiwa em du hapoh yong ki donhi kam ka dakha krem wa heh dooh.
U Rothell Khongsit uwa na ka chnong Khongthong kawa pawnaam kam ka ‘Whistling Village’ da khana u chaphang wa kyrpang ka dustur riti yong ki wa i rukom im ki. Da ong u wa kani ka tamasa da man ko ka rynsan yow khana yei parom yong ki cha ki bru kiwa boon.
Ha kani ka sngi da pynlait leh yaka kot chaphang ka uiñke suwari hapoh ka jylla wa e pyrtuid ‘Glimpses’.
Discussion about this post