Jowai : Yow pynsñiawthooh paidbah chaphang i kjut HIV/AIDS ynne ka sngi da pynman da ka yakop rwai pyllah da ki rwai ki siaw tynre ha Yungwalieh ka Tpep-pale, Jowai.
Ha kani ka yakop da wan chimbynta 6 tylli ki dhab kiwa wan lang wa ki tiar tem tynre kam ka bom, ka duitara wa kiwi kiwi.
Ya kani ka Traditional Folk Song Competition da pynman da ka Society for Urban & Rural Empowerment (SURE) deiwa kyrchaan poisa ka Meghalaya AIDS Control Society (MACS).
Da wan wai ya ka da u A. Shullai, Deputy CEM JHADC kam u kongsan wei da bichaar ya kiwa rwai da u R. Laloo, u K. War wa u K. Pariat.
Neiliang u kongsan da yaroh u ya ini i pyrchang u wanrah ya i pynsñiawthooh paidbah ya i HIV/AIDS lyngba i rwai tynre neibhah i roi ka HIV hapoh ka jylla dang joor i kat dang lai ki sngi.
Kiwa rwai ha kani ka sngi da rwai ki chaphang wow kiar na ki kaam wa pynpoor ya u khniang HIV deiwa pynemkaam ya ki Condom kamjooh leh da kyntu ya ki paidbah wym toh u yoobeiñ namo u kyntait ya kiwa im wa u khniang HIV wei toh u man i ki kiwa pdiang ya ki ha ka imlang sahlang.
Hawa kut ka yakop da pynbna ya ka dhab Aspire kam kiwa jop, wa ar ki Male Voice wei yei kyrdan wa le da yoh da ka Beginners. Ka song poisa man ko kamni T. 10,000 ya kiwa yoh nyngkong, T. 7,000 ya kiwa yoh wa ar katwa kiwa yoh wa le won da yoh ki T. 5,000.
Neiliang u dkhot ka MACS u A. M. Lanong da ong u wa hadien wa bichaar ya ki kyntien wa rwai da chem u wa boon toh dang duna i sñiawthooh yong ki chaphang ka HIV/AIDS wei dang emkaam u pynman ya ki Awareness Program.
U R. Laloo kam u wi na kiwa bichaar da ong u wa ym em tang ka wi leh ka dhab wa chimbynta wa riñ sur kam ya ki rwai tynre hanlada kattæ leh kiwa chimbynta toh kiwa em i sap wei da pynchlur u ya ki wow tih tre ki yow chem ki ya i rukom rwai tynre wei em leh kiwa sikai ya i rukom rwai tynre ha Jowai.
U K. War uwa man leh kam uwi na kiwa bichaar da pynkynmoo u ya i por wa dang khynroo u heipor wa sdang u rwai heiwa boon ki bru wa pyndooh mynsien ki ya oo tang oo lai bait u cha khmat wei da yoh u leh ya ka State Award.
Da pynkut ya ka yalang da ki ktien e khublei na u president ka SURE u K. Pakma.
Discussion about this post