“Ya ki sarok ha Jowai wa da chna pynmiat ha u Kmaichonglad wa u Duyatra du hapoh 6-7 bnai wei chwa wow poi ka Behdieñkhlam kini ki sarok da khoh lut ki,” da ong u President ka Seiñraij Jowai, u OR Challam deiwa kylli leh, “Toh hi ma-ai i chna pynmiat ya ki sarok toh wow pynmiat ya ki namo wow yoh khih donhi ki Contractor mo?
Ya kini ki kyntien da pynsñiaw u Challam hadien wa yaklam wa kiwa pathai khubor ynne ka sngi heiyatoh wa ka lehniam Behdieñkhlam yong uni u snem.
Da ong u wa ha kini ki sngi wa dadep da yoo wa da pyndap ya ki sarok da i khyndaw-bilat wei manda slap da man biang kamjooh, deiwa ong leh wa manda man ki yaseiñ heh kam ki Synod da chna ya ki sarok wow neh ar-le snem tangwa weileh heini ka Seiñraij hap lai mihkhmat lai kyrpaad bait ko ya ka PWD wow chna pynmiat ya ki sarok.
Da e khublei u leh ya ki sahep ka chnat PWD kiwa da kreh wow chna pynmiat ya ki sarok ha ki bynta wa pyndep ya ka lehniam Behdieñkhlam, tangwa sñiawsih wow yoo wa ya ki sarok poh chnong (Internal Road) won toh kiwa sih, wei emkaam wow pyntikna wa ki sarok u man kiwa miat khnang wow lait na iwon iwon iwa sñiawsih kamjooh yow pynsuk ya kiwa wan paitke ya ka Behdieñkhlam.
