Ka Dorbar Chnong Tympang Iawmusiang, lyngba u waheh chnong yong ka, u E. Shylla da pyntip wa ka Executive Committee ka chnong da sñiawkhia ko wa em ki kattu katni ki seiñbhalang kiwa chim kabu ya ka chnong wow leh ya ki kaam khlem pyntip cha ka chnong.
Da ong u wa em ki kattu katni ki seiñ kiwa wanrah ya i sñiawthooh bakla wa i wym yakrehlang manda wan ki chapoh u pood u ang ka chnong.
Heijooh i por da ong u wa neiliang ka Dorbar Chnong ym pyrchah ko ya kiwon kiwon ki kaam neibynta i bha i miat ka chnong ka thaw.
Kamtæ da kyrpaad u ya ki seiñbhalang wa chwa wow leh ki iwon iwon (ki yalang, ki kaam) wow sñiawbha pyntip chwa ya ka chnong.
Chooh chooh da kyntu u ya ki chnong wa ki seiñ kiwa pynman ya kiwon kiwon ki yalang heiwa da emkaam ki wow booh ya ki Flex wa ki Banner hapoh ka chnong wow pyntip chwa cha ka Dorbar Chnong wei hadien wow looid won ya ki manda dep khnang wow wanrah ya i khooid wa i miat ya ka chnong.
Ka Dorbar Chnong da ekhublei kyrpang ko leh ya u Deputy Commissioner ka West Jaiñtia Hills, u Garod LSN Dykes wa da chimkhia u wow thooh ki laad wow pynche biang ya u chrot bordiñ (High Mast Lighting Pole) ha Iawmusiang hadien boon tylli ki snem wei i che biang uni u chrot da wanrah u yei chngaaiñ hapoh ka chnong ka thaw.
