U Montri Rangbah ka jylla, u Conrad Kongal Sangma da ong u wa hawa yaklam u wa ki seiñbhalang ka jylla, da yaroh ki ya ka sorkar MDA neibhah ka dang chim ko ya ki laad ki luti wow pynyoh ya ka ILP deiwa wanrah ya ka Resolution hapoh ka Yung Dorbar, ym toh kam kiwi ki sorkar kiwa da lai kiwa ong wa ym kwah ya ka ILP wei ym wanrah leh ya ka Resolution, tangwa ka sorkar MDA da leh ko ya ini wei dang booddien yeini.
I mynjur yei rai da ka Meghalaya Legislative Assembly wow dawa ya ka Inner Line Permit ha ka jylla da lai ko kattu cha ka 2 snem, tangwa hadooh katni ka sorkar jylla ym ye ko wow pynkohngooh ya ka sorkar India wow pynkrehkaam ya kani ka aiñ ha ka jylla kamwa da dawa da kiwa boon ki seiñbhalang wa ki paidbah.
U Montri Rangbah da ong u wa waroh tip ki wow pynkrehkaam ya ka ILP ym toh ha ka sorkar jylla tangwa toh ha ka sorkar pyrdi, wei ka sorkar jylla dang yaklam wa ko waka sorkar India, heiwa da pynsñiaw yei kyrmen wa ya ka Resolution daw ye wow pynlai bait chakhmat.
U Conrad da ong u ym ye wow klam iyi iyi palat hajrong i pynkrehkaam ya ka ILP neibhah wa toh i bynta yong ka sorkar India, tangwa da pynrap wa ka sorkar jylla ka da leh ko ya i bynta deiwa mynjur ya ka Resolution wei daw pteiñ wow yaklam yow ye u pynkohngooh ya ka sorkar India.
