Da: U Kyrsoibor Pyrtuh
Kam dei ka sien kaba nyngkong ba ki Nonghikai skul SSA kin mih sha surok ban dawa na ka Sorkar ban pynlait ia ka tulop jong ki kaba la sahteng da ki bun bnai. Marwei nga bitar bad dukkha mynsiem ban їohi pylleiῆ pyllieῆ ia ka jingleh bym salia jong ki nongsynshar halor ki jingeh jong ki nonghikai. Hoid ki don ki jingeh ha ka jingpynreikam ia ka skhim SSA ha ka Jylla Meghalaya hapoh kiwei ki Sorkar ne Nongsynshar ha ki snem kiba la lah, pynban ki jingeh ki la nang khraw kat nang mih ki snem. Hato ka jingeh kaba mih mynta ka dei kaba la lang lypa ne kaba jia ryngkhat mynta? Long katba long bad katkum ki nongrim tynrai ka treikam treijam ha ka Sorkar bad rukom synshar paidbah kawei ka Sorkar ka bteng ia ki kam jong kawei pat ka Sorkar kaba la leit, kumta kane ka Sorkar kaba mynta ka dei ban shim ia ka jingkitkhlieh. Kumjuh ruh ha ka Sorkar synrop MDA ka United Democratic Party (UDP) kaba bat ia ka tnat pule puthi ka hap ban jubab sha ki paidbah balei ba ki nonghikai skul ha ka Jylla ki hap ban mih surok ban їakhih ban їoh ia ki hok jong ki kum ka jingsiew thikna bad jingpynheh ia ka tulop?
Ňiuma, ka rukom pynїaid skul ha ka Jylla ka long kaba pher, namar ha kawei ka skul yn shem bun jait ki nonghikai, kum ki nonghikai sorkar, ki nonghikai deficit, ki nonghikai Ad-hoc, ki nonghikai SSA bad RSMA bad kiwei pat ki nonghikai private. Kine ki syrtap treikam ki long ruh ka daw kaba wanrah ia ka jinglah shilliang hapdeng ki nonghikai bad kaba ktah ia ki nonghikai.
Ar snem ha shuwa ban wanrah ia ka jingpynkylla ia ka Riti Synshar ka Ri India kaba phra phew hynriew (86) ha ka snem 2002 bad ka jingthaw ia ka Aiῆ Right to Education ha ka snem 2009, ka Sorkar India ka la pynbna bad pyntreikam ia ka skhim ai jingnang jingstad kaba la tip kum ka Sarva Shiksha Abhiyan (SSA) ha ka snem 2000-01. Ha ka jingpynkylla ia ka Riti Synshar ka Ri India kaba phra phew hynriew la bsuh ia ka Article 21 A ha ka Riti kaba ong, “Ka Jylla ne Ri kan ai ka jinghikai skul ei bad pynlong ia ka jingshong skul ka kamram kaba kongsan na ka bynta baroh ki khynnah naduh 6 haduh 14 snem ka rta” Shuh shuh la pynkylla ia ki katto katne ki kyndon ha ka skhim SSA hadien ba la wanrah ia ka aiῆ Right To Education.
Їa ka skhim SSA la pyntreikam ryngkat bad ki Sorkar Jylla khnang ba yn lah ban pytreikam ha baroh ki Jylla jong ka Ri bad ban lah ban pynbiang pura ia ki jingdonkam jong ka pule puthi ha ka Ri. La shna ruh ia ka skhim ha kata ka rukom ba yn lah ban pynїaid bad pyntreikam ia ka da ki shnong ki thaw, ki dorbar shnong bad kiwei de ki tnat treikam kiba ha trai duh jong ka synshar khadar. Katkum ki bui jong ka Sorkar kine harum ki long ki mat ba kongsan jong ka skhim SSA:
- Ka skhim ka dei na ka bynta ka jingpyntreikam ia ka jingai hikai skul bad jingnang jingstad sha baroh ki khynnah bad ka skhim kan treikam hapoh ka por ba la buh.
- Ka skhim ka dei ruh na ka bynta ban ai ki jinghikai skul tynrai sha ki khynnah.
- Ka skhim kan їarap ban wanrah ia ka hok ha ka imlang sahlang da kaba ai jinghikai bad jingnang jingstad ia ki khynnah.
- Ka jingpyntreikam ia ka skhim kan long da ka jingїashim bynta lang jong ki Managing Committee, ki Dorbar Panchayati Raj, Village Education Committee, ki Seng jong ki nonghikai bad ki kmie ki kpa bad ki Tribal Autonomous Councils ha ka jingpynїaid ia ki skul.
- Kane ka skhim kan wanrah ia jingїadei kaba jan hapdeng ka Jylla, ka Sorkar India bad ki tnat synshar, kum ka synshar shnong ha kaba їadei bad ka jingai jinghikai skul bad jingnang jingstad.
- Ka skhim kan ai ruh ka kabu ia ki Jylla ban thaw ne shna ia ki buit ne ki thup jingtip ban hikai ia ki khynnah ha ki skul.
Naduh ba la pyntreikam ia ka skhim SSA hapoh ka Jylla, ki skul kiba la don lypa jong ki riewshimet, ki skul ba pynїaid da ki Balang ne Niam ki їoh jingkyrshan ne jingmyntoi na kane ka skhim bad kane ka dei ka jingsdang jong ki jingeh kiba mih mynta. Kumta donkam ban shim khia bad ban jurip bniah khnang ban lah ban weng ia kita ki jingeh. Ha u Їaїong mynta ka snem, u President jong ka Meghalaya SSA Teachers Association u la kdew ia kane ka jingdkoh ha ka jingpyntreikam ia ka skhim SSA ha ka Jylla. Une u Nongїalam u la kdew, “katkum ki kyndon jong ka Skhim ia ki nonghikai dei ban thung hapoh ki skul Sorkar kum ki nonghikai ba neh bad ym dei ban thung ha kiwei pat ki skul jong ki riewshimet ne ki skul mission. Hynrei kaei kaba jia ha Meghalaya ka long ba ia ka SSA skhim la pyntreikam pynban ha ki skul jong ki riewshimet, ki skul Balang ne Niam bad ki don ruh katto katne ki skul SSA ba thaw da ka Sorkar.” Une u nongїalam u pynpaw ruh ia ka jinglong san jingmut jong u da kaba ong ba ki nonghikai SSA kiba їakhih kim shym la mih sha surok ban wad daw, wad dong, hynrei ki kwah bad thrang ban weng ia ki jingeh ba ki їakynduh.
Mynta sa shisien pat, ki nonghikai ki la mih biang sha surok da ka jingkut jingmut kaba skhem triang bad ki la pynkhreh ban їakhun haduh kaba kut tat haduh ba ki jingdawa jong ki la pynurlong. Ban shu kdew biang hangne ki jindawa jong ki nonghikai SSA ki long, ban pynlait noh mardor ia ka tulop kaba la sahkut da ki bnai, ban shna da ka rukom kaba paka ia ka rukom siew tulop bad ruh ban kyntiew ia ka tulop jong baroh ki nionghikai SSA ha ki lower primary bad upper primary bad kiwei kiwei.
Hoid, ka jingeh jong ki nonghikai SSA ka long kaba kongsan ban їakren, hynrei to ngin їatai ruh katto katne ki mat kiba la long ka daw jong ka kynrum kynram ha ka jingpyntreikam ia ki skhim bapher kum ka SSA ha ka Jylla. Ka jingїai mih surok ban їakhih da ki nongtrei nongbylla, kum ki nonghikai ka pynpaw shai kdar ia ka jingdkoh bad jingduna ba shyrkhei ha ka jingtreikam treijam jong ka Sorkar Jylla. Man la ka por ka Sorkar ka ai daw ba duna ka pla tyngka. Hynrei ngim dei ban ngeit satia ia kane ka jingkren khlem nongrim jong ka Sorkar namar ka kaiphot jong ka Sorkar hi, kum ka CAG report, ka kdew shai kdar ba ka jingbymlah jong ka Sorkar ban pynbiang ia ki Utilization Certificate sha ka Sorkar Pdeng ka dei ka daw ba kongsan ba ka Jylla kam їoh pisa ha kaba їadei bad ka jingpyntreikam ia ki skhim kaba kynthup ia ka SSA.
Sa kawei pat ka mat kaba ngi hap ban pyrkhat bad shim khia ka long ka jingїashim bynta lang jong ki Shnong ne Dorbar Shnong ha ka jingpynїaid ia ki skhim kum ka SSA. Ka skhim SSA ka kren shai ba ki Tribal Autonomous Council lane lah ban ong ki Dorbar Shnong lane kiwei pat ki kynhun, kiba la thaw katkum ki Aiῆ bad kiba їashim bynta lang da ki nongshong shnong katkum ka riti synshar paidbah ki don ka bynta kaba khraw ban pynїaid ia ki skul SSA. Sngrewsih ban kdew ba haduh mynta ka Jylla Meghalaya, khamtam hapoh ka Khasi Autonomous District Council, ngim don satia ia ki aiῆ treikam treijam na ka bynta ki Dorbar Shnong ki ban pynlah ia ngi ban їashim bynta pura. Ka jingmynthi jong ngi kan buh jingeh ia ki khun ki kti jong ngi ha ka lawei.
Khatduh eh, nga kwah ban buh kane ka jingkylli, nangne shakhmat hato ki nonghikai kin hap ban thiah surok man ka lai ne san bnai ban їoh ia ka hok ne ka tulop jong ki? Ngi dei ban pynkut noh shi syndon ia kane. Ka Jylla kan hap ban sei bor bad mang pisa 29 klur tyngka shibnai na ka bynta ka tulop jong ki nonghikai SSA. Khlem pep lah ban sei bor bad mang ia kata ka pisa da kaba weng kam noh ia baroh ki consultant kiba ka sorkar ka la thung ha ki tnat bapher bapher, nangta ban wengkam noh ia baroh ki nongtrei Sorkar kiba la shongthait na ka kam kiba dang bteng jingtrei kum ki nongtrei contractual, ban pynduh noh ia ki commission khlem kam, ban weng noh mardor ia ki Chief/Political advisor jong ka Sorkar bad ban tehlakam ia ka jingleit jingwan jong ki Myntri bad ophisar Sorkar hapoh lane shabar ka Ri khnang ban pynduna ia ka jingpynlut phut bad pynsyrwa kai ia ka pisa paidbah.
Nga їeng ryngkat bad phi ki nonghikai SSA.
