Ha i pynkut ya ka World No Tobacco Day 2023 ha ka 31 tarik u Naisan hapoh ka jylla Meghalaya hadien wa da pynman ya ki lai paidbah da ki khynnah skur heiwa da em palat 4.9 lak ngut ki khynnah na ki 8000 tylli ki skur wa chimbynta na kylleiñ ka jylla nadooh kiwa em ha ki Block wa ki skur wa em cha sor.
Ha West Jaiñtia Hills District ki khynnah wa da chimbynta da em ki 40,422 ngut na ki 794 tylli ki skur wei da chim ki leh yei soi pyrtuid ki 8,21,447 ngut ki bru kam chibynta ka phang yong uni u snem kawa ong “My Meghalaya, Tobacco Free Meghalaya” yow pyndooh noh yei baam wei dih duma wa boon jait.
I lai pynsñiawthooh paidbah lyngba ka Rally Against Tobacco toh kiwa da sdang nadooh u Naitung (Apr) wei da pynkut ha u Naisan heiwa da sakhi ya ki khynnah skur wa da kbai, da e wyrta wei da rah ki deilang wa ki kyntien wa klam hajrong i maa wow pynemkaam ya kiwon kiwon ki jait duma.
Kani ka lai Rally da man ko leh kam ka yakob heiwa hapoh ka District ha ka kyrdan Primary School da jop ka Kharkhana Govt. LP School, ha Upper Primary da jop ka Madankhliehriat Presbyterian UP School Mowkaiaw, ha ka Secondary da jop da ka Tome Memorial Secondary School katwa ha ka Higher Secondary da jop da ka Laishnong Higher Secondary School.
