Ka Supreme Court ka India ynne hawa pynmih ya ka rai da ki 7 ngut ki Judge, da pynksan ko ya ki jylla wa emhok ki wow bhah namo wow phiah chooh chooh (Subdivide) ya ki jaitbru (ST/SC) hapoh ki Reserved Categories deiwa kheiñ hadooh katwon sahdien ki, yow yoh myntoi ki kamwa toh u yoh ki wei kani ka rai man ko kam chibynta wa bichaar pynkut ya ka mukotduma State of Punjab and ors vs Davinder Singh and ors.
Tangwa ki jylla hawa phiah ya ki jaitbru toh u kheiñ katwon ngut em ki wei kiwon kiwa man kam kiwa sahdien dooh wei ymtoh u leh katwa mon hi-eh.
Ya kani ka rai wa da pynbna da u Chief Justice ka India, u Justice DY Chandrachud deiwa emlang kiwi ki Judge wa kynthup ya ki Justice BR Gavai, u Vikram Nath, ka Bela Trivedi, u Pankaj Mithal, u Satish Chandra Sharma wa u Manoj Misra kiwa da kyrchaan wow phiah chooh chooh namo ka Sub-Classification lait noh ka Justice Trivedi.
Ka yung bichaar da ban joor ko leh yeiwa emkaam wow pynkhlaad noh ya ki “Creamy Layer” namo kiwa da mahajon, kiwa da dap da biang kiwa man kam ki SC, ST wa OBC yow lait ki u yoh myntoi hapoh ka Reservation.
Da ini, da phah ya ki sorkar jylla wow wanrah Policy yow jied kiwon kitæ kiwa man kam ki ‘Creamy Layer’ kiwa man kam ki SC wa ST kawa nachwa kawa jooh krehkaam du ha kiwa man kam ki OBC. Neiliang u Justice Gavai da ong u wa da emkaam wow leh yeini yow pyntikna wa kiwa yoh myntoi na ka Reservation man sakhiat ki kiwa emhok wow yoh ya ka bhah deiwa pynrap wa ki khon kiwa yoh myntoi na ka Reservation ym ye wow pynyarngkat ki wa ki khon kiwa dooh wa duk.
U Justice Nath leh da kyrchaan u yeini deiwa ong wa ka ‘Creamy Layer’ ymtoh u kheiñ du neibynta ki OBC tangwa toh u kheiñ leh ya ki SC wa ST tangwa da kiwi ki jait kyndon.
U Justice Mithal won da ong u wa ka Reservation toh u man ko neibynta chi pateiñ donhi neibhah lada kawi ka pteiñ da ku ko deiwa yoh yarap lyngba ka Reservation, ka pateiñ wa wan ymtoh u yoh ko ya kani ka jooh ka myntoi.
U Justice Sharma da ong u wa da emkaam leh da ka aiñ ka sorkar pyrdi yow jied kiwon kitæ ki ‘Creamy Layer’ hapoh ki SC wa ST.
U Justice Mithal da ong u wa ka Reservation wa katni toh u pteiñ ko tangwa toh u kheiñ deiwi yow yarap ya ki SC/ST/OBC kiwa emkaam sakhiat yei yarap yow ku ki.
Ha India katkam wa krehkaam ka ‘Creamy Layer’ katni, toh neibynta ki OBC kiwa da stat da tip, kiwa da mahajon wei kini ym yoh ki ya ka Reservation ha ki kreh sorkar kamjooh ki thaw puræ yow pyntikna wa du kitu ki OBC kiwa dang sahdien sakhiat ki wow yoh myntoi.
Ki kyndon wa da kheiñ wa em hapoh ka ‘Creamy Layer’ kam ki OBC toh kiwa yoh palat Rs. 8 lak chi snem ka kamai, ki khon ki sahep sorkar kiwa em ha ka kyrdan Group A wa Group B leh da kheiñ kam ki ‘Creamy Layer’.
Ki khon ki Doctor, Engineer wa ki Lawyer kiwa boon ka spah ka phaw leh da kheiñ kam kiwa em hapoh ka ‘Creamy Layer’ neitæ ki manyung kiwa em boon ki thaw rep leh da haap ki ha kani ka jooh.
Discussion about this post