Jowai : Hadien wa da kut i paan por ki Waheh Chnong ka Jowai iwa chi bnai nadooh ka 11 tarik u Naisan (May) ha ka yalang wa da pynman da u CEO ka JMB hapoh ka yung krehkaam yong oo hei yatoh wa ka NPR/Aadhaar yow yoh ki u chong pyrkhat chwa u lai chakhmat heini i kaam, ynne u DC ka West Jaiñtia Hills da pynbna u ya ki tarik yow pynman awareness camp ha ki dong yong ka Jowai.
Kam wow pynkynmoo ha ka 3 tarik uni u bnai leh da dep pynman ya ka yalang paidbah yow pynche hei yatoh wa ka NPR deilang wa ka Aadhaar hapoh ka Auditorium ka District Library Jowai. Wei ha kani ka sngi ki Waheh Chnong da pynsñiaw ki wa kwah ki leh yow pynman sa kam kani ka jooh ka yalang ha waroh ki dong yow che kiwa boon kiwa ym em u yoh u emlang ha ka tai ka yalang.
Kamtæ u DC ka WJH da pynbna u wa ha ki le tylli ki Block ka Laskein, Thadlaskein wa Amlarem i thap pyrtuid dang lai bait i chaaid chaaid haddoh katni, tangwa ha Jowai daw pynman chwa da ki Awareness Camp chwa u thap pyrtuid ha ka NPR.
Ki tarik yong kini ki awareness camp ha Jowai man ki kamni næ ha wah:
Lumpariat – 17 Naiynru (June) 10 waje i step ha Yung Dorbar Chnong.
Dongmihsni – 17 Naiynru (June) 1 waje i sngi ha yung Dorbar Chnong.
Dulong – 17 Naiynru (June) 4 waje i janmiet ha yung walieh ka chnong.
Mooralong (Memory Colony) wa Mookyrdop deilang ha ka 18 Naiynru (June) 10 waje i step ha yung Dorbar Chnong Hall ka Mookyrdup.
Mynthong – 18 Naiynru (June) 1 waje i sngi ha yung Dorbar Chnong.
New Hill – 18th Naiynru (June) 4 waje i janmiet ha yung Dorbar Chnong.
Ha kini ki Awareness Camp daw em ki bru wa tip bniah bha chaphang ka NPR wa ka Aadhaar na ka Directorate of Census Operations.
Hadien wa pyndep ya kini ki awareness camp daw pynman ya ki Enrollment Camp deiwa sdang chwa ha Lumpariat ha ka 20 tarik nadooh i poor 10 waje i step. Wei daw lai cha kiwi ki dong katkam i por wa khut ki Waheh Chnong.
Discussion about this post