Ynne ka sngi u Montri ka chnat Sports & Youth Affairs ka jylla uwa man leh u MLA ka Jowai, u Wailadmiki Shylla da wan wai u ya ka Fresher’s Meet ki khynnah ka Kiang Nangbah Government College, Jowai.
Ha kani ka sngi kam chibynta i kyrpaad ki khynnah, hadien ka yalang da pynman yei lai pait ya ka madan ka Kiang Nangbah College kamjooh ka madan Basketball ka College hei emlang u Chief Engineer ka chnat Sports, u M. Marbaniang wa ki sahep na ka chnat Sports.
U Wailadmiki da phah u ya ki sahep wow pynbiang ya ka Estimate khnang wow ye u kreh pynmiat ya kini ki thaw yalehke khnang wow ye u pyndep ya ki hapoh u Wisu (March) 2026 wei u kreh leh deiwa paka deiwa miat bha.
Hadien ini da lai cha ka Jowai Polytechnic wow pait ya ka thaw wow chna ya ka madan Football wa ka Basketball neibhah wa chirup wa i puræ emkaam leh yei yalehke ki khynnah.
U Wailadmiki da chong yaklam u leh wa ki khynnah ka Polytechnic kamjooh wa kiwa sikai kani ka thaw puræ wei da lai pait u leh ya ki Workshop kani ka thaw.
Heiyatoh wa ka Automobile Workshop, u Wailadmiki da ong u wa kani man ko ka sien wa nyngkong ya oo wow yoo u ka heiwa da chem wa boon ki tiar man ki kiwa da rim heiwa da emkaam ya ki tiar wa man katkam ka juk wa katni wei yeini daw chimkhia bha u ki.
Hajrong i dawa wa da sah boon snem wow pynboon ya ki Course ha ka Polytechnic, neiliang u Wailadmiki da pynche u wa ka sorkar yaleh ko wow booh ya ki Course katkam ki thaw heiwa iwa em ha Jowai ym em ki chawi katwa kiwa em chawi ym em ki ha Jowai deiwa pynrap wa u Principal da ong u wa emkaam u pynjanai wei wow pynheh chwa ya ki thaw sikai neibhah i thaw da man iwa khian bha.
Heiyatoh wa kini, u Wailadmiki da ong u wa daw chimkhia wow yaklam u wa ka sorkar.
Discussion about this post