Ka mukotduma PIL pyrchah ya ki karkhana Coke hapoh ka jylla da chong bichaar biang ka ynne ka sngi da ka Meghalaya High Court heiwa u Director General of Police (DGP) da e jubab u wa ki tre wa pynkrehkaam ya kini ki karkhana toh kiwa na Assam kiwa da wan seiñ ya kini ki karkhana pyrchah ya ka aiñ hapoh Meghalaya wei da chem leh wa em boon kiwa leh Benami heiyatoh wa ini i kaam.
Neiliang won uwa yaleh mukotduma da ong u wa kini ki tre karkhana toh kiwa da tipmit bha ki bru kiwa da uiñ laitlooid ha Guwahati wei du kiwa tip heiwon sah ki kamjooh ki kaam wa leh ki.
Ka yung bichaar da yooluti ko wa ki pulit u leh smat ki yei kaam yong ki wei wow e jubab ki hapoh le tayaaw.
Neiliang won u Justice Katakey da wanrah u ya ka 14th Interim Report heiwa da khana u wa boon bha ini i kaam pyrchah aiñ wa da leh da ki Coke Factory wei kamjooh leh ki Ferro Alloy Plants.
Da pyntip leh wa ha East Jaiñtia Hills da em 13 tylli ki karkhana Coke kiwa dang krehkaam katwa 38 tylli won toh ki wym em de krehkaam. Ha West Jaiñtia Hills da em ar tylli ki karkhana Coke ki wym em de krehkaam katwa ha South West Khasi Hills won da em 6 tylli tangwa ki wym em de krehkaam.
Ha West Khasi Hills won da em 4 tylli ki karkhana Coke kiwa dang krehkaam wa 61 tylli won ki wym em de krehkaam wei em leh kawi ka Ferro Alloy Plant kawa krehkaam ha West Khasi Hills.
Ha Ri-Bhoi won ymem karkhana Coke tangwa em 5 tylli ki Ferro Alloy Plant kiwa krehkaam na ki 7 tylli.
Ka High Court da sñiawphylla ko wa u Justice Katakey da chem u kat da kini kiwa krehkaam khlem yoh bor katwa ka sorkar jylla won ym tip ko wei u DGP hap u wow khana kammon da leh ki yeini wa da chem ha ka 14th Interim Report.
Da ong leh wa kani ka hukum wa da pynmih ynne ka sngi ymem khang ko ya kitu ki karkhana wa krehkaam deiwa yoh bor tangwa ka sorkar toh u paitbniah ko neiwon yoh mooyong ki.
Ya kani ka mukotduma u chong bichaar biang ha ka 03-07-23.
