Ka yung krehkaam ka Development Commissioner ka sorkar Meghalaya da kyntu ko ya kiwa chong chnong ka Meghalaya ki wym pu em leh Aadhaar wow leh smat noh ki wei yeini i kyntu toh hadien wa ka UIDAI da pynmih Circular wow e por 3 bnai ya ki jylla wow pyndep ki yeini wei lada ym leh daw dooh ki yei yarap na ka sorkar pyrdi wa kynthup ya ki Subsidy.
Da ong wa ka jylla Meghalaya toh kawa duna bha kiwa em Aadhaar wei ye kiwa chong chnong wow dooh myntoi na ki Social Welfare Scheme ka sorkar pyrdi khamtam ki Scheme wa yarap ya ki kynthai wa ki khynnah kam ka Supplementary Nutrition Programme (SNP) hapoh ka ICDS yong ka Social Welfare Department kawa man ka Scheme yarap e baam, hadooh u khoo rachon, MGNERGA, NSAP (ka bai baam tymmen), LGP Connection wa kiwi kiwi de.
Khlem u Aadhaar Number, daw yoh ki du 10 % i baam iwa man neibynta ki khonboo wa ki khynnah wa em 0-6 snem i rta, ki kynthai wa punkhon wa ki manbei wa dang e bu khon nadooh ki bnai wow wan.
Chooh chooh kiwi ki Scheme kam ka Ayushman Bharat toh kawa da pynkrehkaam hapoh ka jylla kam ka Megha Health Insurance Scheme (MHIS) wei kani leh emkaam Aadhaar yow ye u thap pyrtuid hapoh yong ka.
Hanla ka sorkar Meghalaya da pynlait ko nei pynbor wow leh Aadhaar tangwa ki Scheme ka sorkar pyrdi emkaam wow em Aadhaar yow ye u yoh myntoi.
Kamtæ neiliang ka sorkar jylla yow yarap ya kiwa chong chnong wow yoh Aadhaar da pynman ko ya ka “50 Days Aadhaar Saturation Programme” yow thap pyrtuid nadooh ki khonboo, ki khynnah, ki kynthai ki wym pu em Aadhaar neibhah ki khynnah wa em 0-6 snem duna bha kiwa em Aadhaar iwa du 10-12% donhi.
Kamtæ ha kini ki 50 sngi neibynta ki khynnah wa hapoh 5 snem ym emkaam wow chim yei chon kti wa ki pyllun khmat namo ka Biometrics ki wei lada em ki wym em Birth Certificate daw e yarap ya ki.
Da phah ya waroh ki DC wow leh ki yeiwa emkaam yow yarap ya ki paidbah.
