Shillong: U Chairman ka CoMSO, u Robertjune Kharjahrin da beiñ joor u ya u Lat ka Meghalaya, u Tathagata Roy deiwa ong wa man u uwa pynchit man ka sngi ya ki paidbah deiwa thoh u ha ki Social Media pyrchah ya ki paidbah ka jylla.
Ini i ther u Kharjahrin, toh hadien wa u Lat da thoh u ha Twitter ynnin ka sngi:
“Two things should never be lost sight of in the present atmosphere of controversy.
- The country was once divided in the name of religion.
- A democracy is NECESSARILY DIVISIVE. If you don’t want it go to North Korea.”
Iwa ong wa chisien yaka ri da dep phiah yaka hei pyrtuid ka naim wei haka synchaar paidbah da em bait i ya pyrchah i wym sñiawthooh yumut wei ki wym kwah yeini ye ki wow lai cha North Korea.
U Kharjahrin da ong u wa u Lat toh wow lai u cha North Korea, ileh wan chong u heini ha ri Khasi wa chong wa sah du ki bru ri-loom.
Hajrong i wym soi u Lat yaka Ordinance yong ka MRSSA, u Kharjahrin da ther u deiwa ong wa uni u Lat da leh embor u leh yaka rai yong ka kynhun ki montri ka sorkar jylla, heiwa yaka sorkar da jied da ki paidbah.
Da ong u wa ka CoMSO ym pdiang da kammon kammon leh yei leh u Lat wow yoobeiñ ya i rai yong ki montri hawa ki paidbah da jied ki ya kiwa mihkhmat.
Uwa yahkhmat ka CoMSO da ong chooh chooh u wa ka ri India ym toh du ka ri synchaar paidbah tangwa man ko leh ka ri kawa boon ki jait ngait wa ki niam, wei du i rai kiwa boon paid khlem burom won ya kiwa khian paaid wa ym ye u man khlem da burom chooh ya ka Article 14, kawa klam che ya ka hok wa mar kamjooh, wa ka Article 25 kawa kdaw ya ka hok ha ka rukom im wa ki riti dustur.
U Kharjahrin da beiñ u leh ya ini i thoh u Lat wei da dawa leh na u Lat wa toh u sangeh noh chisyndon ya kiwon kiwon i thoh kiwa ktah wow pynchit ya ki paidbah, neibhah lada pynchit ya ki paidbah daw mih bait i ktah ya ka suk ka saiñ kawa ka jylla ym ye ko wow pdiang.
Discussion about this post