Da: U Soolangki D. Laloo, Jowai
Kiang Nangbah, dapchynrang ka Ri
Khlawait wakhroo man mi!
Na pyrdi u paaid, wa boon waroh
U Blai ya me da jied da thooh.
Me sakhiat u tæ u Khad-ar bor
Wym em i thok, wym em i chukor.
Chisur chidur hei hok yieñ skem mi
Wow yaleh pyrchah ya ki mynder sepsngi
Mynsien maya Ri pynyoo mi ki
Hadooh wa kut ha’u tylle pasi.
Khroo yutang sakhiat man mi
Neibynta ka jaitbru, ka Ri
Nongialam, Nongialeh kam me!
Cheiwon u chem wan de.
U bru wa em ka ñia ka yurim
Ya ka Ri wa ka jaitbru u pynim.
Kyntien wa hok kiwa khlai mi
Kyntien yong me man ka sakhi.
Ha khmat u bru na dwar u Blai
Yei suk wanrah mi cha pyrthai.
Aa! woh Kiang han em mi cha Sangia
Ya ka Ri wa maya yong me to ksan ñia.
To e i sneiñ, pynyoo cha wa thiah wa chong
Yoh ki khon ka Ri u tip u kune, u syndong.
To psiah hei mynsien wei sñiaw ki khon ka ri
Ha ki nongialam ka juk katni.
To yah, to chdooh lang ya ki
Ha ka luti i hok wa chisur donhi.
Khon ka Ri! ka juk katni
Khutlang O waroh ya phi.
To ya bood nongmuna wa bha
Kam u Kiang wa maya yong phi yong nga.
Mynsien adnood, bichni
To beh chajngai na nga, na phi,
Ya sñiaw chi-payu, yaman iwi
Yow im ka jaitbru yow im ka Ri.
Discussion about this post