Da: U Soolangki D.Laloo, Jowai
U Kiang Nangbah toh uwi na ki satar wa u Trekirot da booh kyrpang u ha ka Bri U Ynñiawtrep Ynñiawskum. Katwon sñiawsuk u tip wa man-u-snem ha ka 30 tarik u Kmaichonglad ki khon ka ri kynmoo warom, kynmoo maya ki ya oo, kam uwi na kiwa yaleh laitlooid wa sakhiat wa hok, wa chlur, wa chisur wei chynrang hei mynsien kat hadooh wow hap u pynchah da u rdang ha’u tylle pasi yong ki pharæng du neibynta wow yoh ki khon ka ri yei hok wei chongsuk chongsaaiñ kamjooh leh yow lait nei broo næ i chah synchaar ha kti kiwi kiwa wan ha kini ki loom, ki chnong ki thaw yong i da ka luti wow lehbor, thombor wei wow knieh yei synchaar na kti yong ki tre ri, tre muluk.
U Kiang Nangbah neibynta ka ri wa ka jaitbru, yieñ u wow yada yei hok, kynti ki khon ka ri kat hadooh wow poi u pood wow hap u bynda dei rynyieñ ha u tylle pasi yong ki bru ka sorkar pharæng ha ka 30 tarik u Kmaichonglad 1862.
Kam u khon dap chynrang ka Nia Rimai Nangbah, u Kiang da pynyoo sakhiat u yei chlur mynsien yong oo kam uwa yahkhmat wa hok yong ki khon ka ri 12 Dolloi, hakhmat ka dorbar wa khut ha madan Madiah Kmaiblai da yeiñ u na khap uwa boon walang wow thooh ka sakhi blai deiwa ngam cha ka thwai Syntu Ksiar wei wow rah ya ka chnat dieñ wa em ya ki sla wa yirngam. Kam u bru wa em i kitkhlieh wei kitkhia ya ka ri wa ka jaitbru, ym hun u wa ki mynder ri u yohlaad ki u synchaar katwa ki tre ri, tre muluk won u im ki hapyrdi i tynjooh wei dukha mynsien miet wa sngi, kam u bru wa maya ya ka niam, ka rukom, dustur riti ym kwah u wa kini kiyi kiyi ki rukom man kyrpang ka jaitbru u dooh u dam ki hapoh kani ka ri ka muluk wa maya ka yong oo.
Kam ki pateiñ kani ka juk won yi em i wow leh, heiyatoh wow Kiang Nangbah? Yi em i wow ong næ kylli chaphang ka ri 30 Syiem, 12 Daloi ha kini ki sngi wa katni? Yi em i wow leh neibynta ka ri wa ka jaitbru kawa da em hei tynjooh kat chawa pait wa kyruiñ, kat cha wa lai wa wan? Yi em i wow ong næ kylli ya kiwa yahkhmat wa ya ki bru maya ri kani ka juk kiwa yieñ wow chakri ya ka ri wa ka jaitbru wa khian paaid ka yong i? Toh sakhiat mo, bood late i ya ka luti wa yah wa tyoor u Kiang Nangbah?
