Shillong: Ka Additional Director ka tnat ka chait i khiah ka Dr. B. Mawthoh da ong ko wa boon ki bru khamtam ha ki thaw nongkyndong hapoh ka jylla dang ngait biej ki wei kiar ki na ki injection ya ki khon ki.
Hawa klam ya kiwa thoh khubor ynne ka sngi ka Dr. Mawthoh da ong ko wa wa ini i ngait ki bru booh ko i eh ya ka tnat neibhah ymchah ki wow inject ya ki khon ki wow yada na ki kjut.
Da ong ko wa ka sorkar pyrdi da booh ko wow sdang biang ya ka Mission Indradhanush ha ka 8 tarik uni u bnai ha ki ynñiaw tylli ki district wa kynthup ya ka East Jaiñtia Hills, East Khasi Hills, North Garo Hills, South West Khasi Hills, West Jaiñtia Hills wa West Garo Hills wei napyrdi kini wa eh wow pynsñiawthooh ya ki manbei manpa toh ka East Khasi Hills.
Da kyntu ko ya ki bor chnong, ki heh niam wa kiwi kiwi wow pynsñiawthooh ya ki paidbah wymhoi u ngait biej wei wow wan chakhmat wow e injection.
Ya ka Mission Indradhanush (IM) da sdang ha u Kmaichonglad yong u snem 2014, wow pyndih dawai kyrpang ya ki khynnah wa ki manbei wa punkhon wei toh kawa hadooh u snem 2020 lyngba ka scheme Universal Immunization Programme.
Ka Universal Immunization Programme da sdang ya ka ha India ha u snem 1985, tangwa i e dawai hadooh katni da ye u e dawai ya ki khynnah wa ki manbei toh du 65% donhi.
Discussion about this post