U Montri ka chnat Sports & Youth Affairs, u Banteidor Lyngdoh ynne da kitbok kitrwiang u ya ki dkhot ka Ryntih Sports & Cultural Club kiwa daw lai chimbynta ha ka Hero League Qualifiers, kawa daw pynman ha Bangalore nadooh 4-25 tarik u Naichiphaw, 2021.
Ya ini da leh ha ka yalang wa da pynman da ka Directorate of Sports & Youth Affairs, ka sorkar Meghalaya ha ka VIP Gallery ka JN Sports Complex, Polo.
Hawa e yei klam, u Banteidor Lyngdoh da ong u wa emkaam wow pynkhai im biang ya ka yalehke Football hapoh ka jylla. Da pynsñiaw u yei sñiawsih wa boon ki Football Club ka jylla ym ye ki wow im u neh chislem neidaw wa chitom poisa wei wa duna i yarap na ka sorkar. Kamtæ da pynbna u ya ka yarap poisa cha ki Football Cub ka jylla kawa T. 10 Lak ya kiwa yoh u psiah cha ka 2nd Division I-League, T. 40 Lak kiwa yoh u psiah I-League wa T. 1 Klur ya kiwa yoh u psiah cha ka Indian Super League.
Da pyntip u leh wa da khut Tender kawa T. 34 Klur yow chna pynmiat ya ka J N Sports Complex kawa daw yoh ya u Artificial wa Natural Turf wei kiwi de kiwa emkaam ki wow man kam ka juk kawa katni.
Daw chna leh ya ka Indoor Multipurpose Sports Complex ha ka mala wa 5 kawa daw chongdor kamwa T. 100 Klur. Kani ka Complex daw em ko ya ka Swimming Pool, Basketball, Tennis Court wa kiwi de iwa emkaam yalehke. Wei kam kini ki jait daw sdang leh ha kiwi ki District yow yarap pynpliah yei sap ki khynroo khyllood. Chooh chooh da ong u wa najrong ka yalehke Football, ka sorkar leh da rai ko wow pynku ya kiwi ki jait yalehke kam ka Boxing, Archery, Athletics wa kiwi kiwi iwa daw yarap wow pynku ya kiwa yalehke ka jylla.
U Montri da e u leh ya ki kyntien pynchlur ya ki dkhot wa kiwa yalehke ka Ryntih Sports & Cultural Club deiwa ban joor yei emkaam wow ya krehlang hawa yakhun yow poi cha ka thong.
Hadien ini, u Montri da e yarap u da ka poisa wa T. 2 Lak ya ka Ryntih Sports & Cultural Club wei daw e won sa T. 8 Lak ha ki por wow wan.
