Ka West Jaiñtia District Badminton Association (WJDBA) ynne i janmiet da kitbok ko ya kiwa yalehke Badminton chwa wow lai yakhun ki ha ka lympung 39th State Badminton Championship 2024.
Ya kani ka lympung daw pynman ha SAI Indoor Stadium, NEHU nadooh 28 hadooh 31 tarik uni u bnai.
Ya ini i kitbok chwa wow lai yakhun ki da pynman ha Indoor Hall ka Seiñraij Jowai iwa em ha Tpep Pale, Jowai.
Neiliang ka WJDBA u lai mihkhmat da ki 35 ngut (29 ki chynrang wa 6 ngut ki kynthai deilang wa u Manager wa u Coach) ki wow yakhun ha ki kyrdan Under 13,15,17,19 kamjooh ki Senior Category.
Ha kani ka janmiet da yoh leh i klam na u President ka seiñ, u Dawanroi Pyrbot wa u Secretary, u Rimilan Passah kiwa da sneiñ kyntu ya kiwa yalehke yow yoh ki yei naam jop wow rah yei naam i burom ya ka District waroh kawi.
Da kyntu leh ya kiwa yalehke wa manda jop ki wym hoi u man kiwa sarong wei kiwa rem leh ymtoh u yaam rem ki tangwa wow man kiwa dang tia chaphrang deiwa kreh chitom khnang wow ye ki u mihkhmat ya ka jylla ha kawi ka sngi.
Ha kani ka janmiet da kitbok leh ya kiwa yalehke wei da e kti leh ya ki da ki Jersey hei emlang kiwi kiwa kitkaam wa ki dkhot yong ka seiñ.
Discussion about this post