Ka West Jaiñtia District Sports Association (WJDSA) ynne ka sngi da kitbok kitrwiang ko ya ka Niaw Wasa United Sports & Cultural Club, chwa wow lai mihkhmat ko cha ka ‘Hero Futsal Club Championship’ wa pynman da ka All India Football Federation ha nongbah Delhi nadooh ka 5 hadooh 13 tarik u Khonchonglad (Nov) 2021.
Neiliang ka WJDSA da pynman ko ya ka yalang wa tbian ha Kiang Nangbah Stadium Ladthalaboh, Dongmihsngi Jowai hei emlang u Working President ka WJDSA, u EMH Passah, u Hony. General Secretary u L. Laloo wa u Treasurer u Junemon Paswet wow e i kitbok ya ka Club hapoh i yahkhmat u President u Monlang Nongtdu heiwa da ekti ha oo ya ka song poisa kawa T. 40,000 ka wow man kam ka laad yarap ya ki.
U Monlang Nongtdu da e khublei u ya ka WJDSA wa da e yarap ko wei wa da kitbok ko ya ka Club.
U Hony. General Secretary u L. Laloo da ong u wa ka WJDSA da dap ko dei mynsien wa kmen wa ka Niaw Wasa United u lai chimbynta ko ha ka ‘Hero Futsal Club Championship’ ha Delhi wei ymtoh u man ki kiwa dooh mynsien.
U EMH Passah da pynsñiaw u wa ka WJDSA kyrmen skem ko wa kani ka Club daw man ko kawa jop ha kani ka lympung wow man ha Nongbah Delhi.
Kani ka Club daw mih ko na ka jylla ha ka 28 tarik wei da em 16 tylli ki Club ki wow chimbynta ha kani ka lympung wa kynthup ya ka Baroda FC (Gujarat), Chanmari Zothan Futsal (Mizoram), Kuppuraj FC (Puducherry), Super Strikers FC (Karnataka), Speed Force FC (Telangana), Sporting Clube de Goa (Goa), Delhi FC (Delhi), Real Kashmir FC (Kashmir), Telongjem FC (Nagaland), Classic Football Academy (Manipur), Mangal Club (Odisha), Niaw Wasa United Sports & Cultural Club (Meghalaya), Bengaluru FC (Karnataka), TRAU FC (Manipur), Mohammedan SC (West Bengal), Sudeva Delhi FC (Delhi).
