Kam chibynta wow pynduna yei dih sikret, dih duma wei wow pynkrehkaam yaka aiñ Cigarettes and Other Tobacco Products Act (COTPA) kawa man leh kam ka aiñ yow yada ya ki wym em dih sikret nei tdem wa pynmih kiwa dih sikret khamtam ki khynnah yow lait ki u sdang u pynemkaam ya kiwon kiwon ki jait duma, neiliang ki pulit da ka Meghalaya da daiñ kuna ki ya ki bru hapoh kani ka aiñ.
Katkam i leh sorjamin da ka Global Adult Tobacco Survey (2017), 28.3% ki bru ha Meghalaya toh kiwa hap riñ mynsien yei tdem kiwa dih sikret ha ki thaw paidbah wa 45.7% won ha ki thaw kreh.
Kamtæ iwa boon dooh i daiñ kuna toh iwa leh da ki pulit ka Amlarem, Jowai wa Dawki Police Station ka West Jaintia Hills heiwa kiwa boon na kini toh kiwa da chem wa dih sikret cha ki yaaw ki haat kamjooh cha jan ki skur.
Ka Inspector B.R. Marak wa u Head-Constable Humbahadur Thapa toh kiwi na ki pulit wa da uiñ sonteri ha yaaw Amlarem kiwa daiñ kuna dei langær ya kitu kiwa dih sikret.
Hapoh ka National Tobacco Control Programme (NTCP), Meghalaya da e sikai ya ki pulit chaphang ka aiñ COTPA yow pynchitom ya kitu kiwa dih sikret ha ki thaw paidbah wa kiwa dai duma sikret hapoh 100 Meter na ki thaw puræ.
Da daiñ kuna leh ya kiwa dih sikret ha ki yaaw ki haat, ki dukan, ki thaw yang kari wa kiwi kiwi de.
Ka Huldamon Surong, kawa dai jhoor ha yaaw Amlarem da yaroh ko yeini wa leh ki pulit neibhah katni da duna bha kiwa dih sikret hapoh ka yaaw nadooh wa sdang ki pulit wow daiñ kuna.
Neiliang ka State Nodal Officer ka NTCP, NHM ka sorkar Meghalaya, ka Dr. Lana L Nongbri da ong ko, “50% na waroh kiwa yoh Cancer wa 90% kiwa yoh Cancer ha ktien toh kiwa pynemkaam duma. 10% kiwa yap nei tdem sikret toh ki wym em dih sikret tangwa neidaw wa riñ mynsien ki yei tdem sikret.”
Discussion about this post