Kiwa boon ki karkhana wa em ha Byrnihat toh kiwa haap hapoh ka Assam: Conrad

U Montri Rangbah ka jylla, u Conrad Sangma ynne da pynche u yei mih khubor wa ong wa ka Byrnihat toh ka chnong wa tngit wei jakhlia dooh ka la-ær hapoh pyrthai.

U Conrad da ong u wa i mih khubor toh katkam ka World Air Quality Report 2024 wa leh da ka IQAir kawa da ong wa ka Byrnihat ym duna PM2.5 na 128.2 microgram per cubic meter (µg/m3) tangwa deiwa pait won yei chim yukheiñ na ki 4 tylli ki Manual Ambient Air Quality Monitoring Stations yong ka Meghalaya State Pollution Control Board (MSPCB) ha u snem 2024, da chem wa man ko 50.1 microgram per cubic meter (µg/m3) ha waroh kawi ka chnong Byrnihat.

Ha uni u snem won hadooh ka tayaaw wa nyngkong uni u bnai, ka Air Quality Index (AQI) man ko hapoh 100 heiwa 51-100 man ko kawa biang katkam ki kyndon ka Central Pollution Control Board (CPCB).

Da pyntip u leh wa ka MSPCB hadien wa lai pynman ko yei lai pait lai sylli syndet syndet da chem yei em ki karkhana ki wym biang ki tiar ki taar wow pynduna yei pynmih tdem na ki toskhana wei da phah khang ya 7 tylli kini ki karkhana ki wym em bood ya ki kyndon.

Related posts

Jop uwa na Byndihati ya ka Bolero wa pynkhle ka Seiñ Kyntu Seiñ Raij 12 Daloi

March 14, 2025

Sñiawngooh ka chnong Hingaria ya ki BSF

March 14, 2025

Ya kini ki karkhana da phah khang ki nadooh u bnai nyngkong uni u snem. Tangwa wot hadien wa da khang leh, ka AQI wa chim yukheiñ ka Continuous Ambient Air Quality Monitoring Station (CAAQMS) wa da booh ka Central Academy for State Forest Service (CASFOS) ha Byrnihat, Assam, da chem wa ka AQI namo i long i man ka la-ær toh iwa sih bha (Poor/Very Poor) wei ini ye u man toh i tngit i jakhlia iwa mih neiliang ki karkhana wa em cheiliang ka Assam.

Da pynkynmoo u wa ka Byrnihat toh kawa em leh ha Assam kawa man ka thaw booh karkhana hi kawa da pteiñ chadooh Meghalaya wei dadep pynbna ka kam ka Critically Polluted Area (CPA) da ka Central Pollution Control Board (CPCB), Delhi heiwa dadep leh wow kdaw wa em 20 tylli ki Red Category Industry ha Byrnihat ka Assam katwa ha Meghalaya da em 5 tylli wei katkam wa da phah ka NGT waka CPCB, neiliang ka Assam PCB da pynkhreh ko ya ka Action Plan yow pynbha pynmiat ya ka la-ær ka thaw ka bhaw wa em ha thaaiñ Byrnihat ka Assam.

U Conrad da khana u leh wa dadep thoh chithi u cha u Montri Rangbah ka Assam yow khut ya oo wow chna da ka Joint Action Plan deiwa emlang ki bru wa chemphang na waroh arliang neibhah kani ka chnong toh kawa em ha khappood ki ar jylla.

Da kular u leh ya kiwa chong chnong ka Byrnihat wa ka sorkar u chimkhia ko yeini neibhah wa kani ka kaam toh kawa emkaam bha wei sñiawkhia bha yow pynbha pynmiat ya ka soodong sookun kani ka thaw.