Ynne ka sngi ka Delimitation Committee yong i phiah ya ki MDC Constituency ka JHADC da pynman ko ya ka Public Hearing neibynta ki 16 Constituency kiwa kynthup ya ka Amwi-Khliehtyrshi, Mukhla-Ummulong, Moodymmai-Nongkhroh, Wahiajer-Kyndong, Moodop–Umladang, Mynso-Nongjngi, Mynsngat–Khanduli, Shiliangmyntang-Namdong, Barato-Mukroh, Mowtyrshiah–Saphai, Sahsniang-Mowkaiaw, Raliang, Shangpung, Jowai–North, Jowai–Central wa Jowai–South.
Ya kani ka pynsñiaw paidbah da pynman ha District Library Auditorium, Mynthong Jowai.
Neiliang u N. Kyndait na chnong Mupyut da pyrchah u ya i phiah ya ki Constituency deiwa ong wa ymhoi u pynjngai ya ki chnong kiwa marjan.
U L. Laloo, Waheh Chnong ka Ummulong da pyrchah u yei phiah Constituency wei da dawa u neh kam ka Ummulong-Moodymmai wei ymtoh wow pynjngai ya ka deiwa pynmih ya ka Ummulong-Mukhla.
U S. Langi na Ummulong da ong u wa i phiah ya ki Constituency toh u man i katkam i boon bru, i man ki chnong ki thaw, u pood wa kiwi katwa kamtæ da pyrchah ya i phiah ya ka Constituency deiwa ong i phiah toh iwa kynthiar nawi chawi deiwa kyntu ya ka Committee wow pyrkhat arisen ya i phiah ya ka Constituency.
U Waheh Chnong ka Nonglatem da ong u wa pdiang ya i phiah Constituency neibhah wa ka chnong toh luti ko waka Moodymmai kamjooh u Waheh Chnong Nongkhroh leh da pdiang u ya i phiah ya ka Constituency.
Neiliang u Malbi Timung, Waheh Chnong ka Ksehrynshang da pyrchah u yei phiah Constituency deiwa ong wa emkaam u leh katkam ka Geographical Boundary namo u pood wa man ki loom ki wah.
U Parenting Shylla na Moobakhon wa u Phros Dkhar da pyrchah ki yei phiah ya ka Constituency neibhah wa man iwa khlem yurim wa iwa pynjngai ya ka chnong na ki chnong wa jooh em nachwa.
U S. Siangsha, u Waheh Chnong ka Kyndontuber da ong u wym hun ka chnong ya i phiah ya ka Constituency neibhah wa man iwa khlem yurim khamtam i jngai ka chnong na kiwi heiwa da pakhot ya ka nawi chawi iwa pynjngai ya kawi chawi. Da kyntu u wow pait biang ya ka Delimitation wei da maham ka chnong wow Boycott namo u dam u chimbynta ha ka Election MDC ka wow wan.
U Waheh Chnong ka Nongmulieh da pyrchah joor u ya i phiah Constituency heiwa nachwa jooh em ko ha Nongjngi katwa katni da booh cha Waiahjer Constituency kamtæ da dawa wow neh hapoh ka Constituency warim.
U E. Ryngkhlem na Madur da pyrchah joor u ya i phiah ya ka Constituency deiwa dawa wow pynyajan kamwa man nachwa ymtoh kamwa da thmu katni wow pynhaap ya ka chnong hapoh ka Amwi-Khliehtyrshi Constituency.
U W. Lamare, Waheh Chnong ka Sehlama da ong u wa kam ka chnong da pyrchah joor ko ya i phiah ya ka Constituency heiwa da pynmih ya ki chnong wa jooh em chirup chawi won.
U Secretary ka Nartiang, u Sati Swer da pyrchah joor u neibhah kamwa da thmu ka Committee da pynwiar ko ya i pyrtuid ka Constituency wei da dawa leh wa ymtoh wow phiah ya ka chnong lym kamtæ daw lai chaphrang wow dam u thap Vote ha ka Election MDC kawa daw wan.
Ka Songbait Myria na Nartiang da ong ko wa kani ka Committee da ah ko ya i pyrtuid ka chnong wei lada ym pdiang yeiwa dawa ka chnong, daw dam ki u thap Vote wei u lai leh wot cha yung Kasari.
U Secretary Chnong ka Mynso-A da kyrchaan u ya i phiah ya ka Constituency deiwa sñiawkmen wa daw yoh ya ki kaam pynroi ha ka chnong liang wanang wei ini man i katkam ka synchaar paidbah ka ri. Da ong u leh wa pyrchah ya i phiah ya ka 9-Nongjngi kawa jooh haap ha chnong Mynso nachwa. Heijooh i por da pyrchah ya i pynwandur ya ki chnong ha ki Constituency iwa yajngai da ki phaw Kilometer iwa pynchitom ya ki paidbah.
U Waheh Chnong ka Mynso-A, u E. Sungoh da pyrchah joor ya i phiah ya ki Constituency deiwa kyrpaad ya ka Committee wow e para marjan chnong yow suk ki paidbah hei lai i wan.
U Hoping Shadap na Sehlama da pyrchah u ya i thmu wow phiah ya ka Constituency.
U Rijoy Chen, Waheh Chnong ka Sanaro da ong u wa i pyrchah toh wa jngai wow lai ki cha Barato-Mukroh kamtæ da kyrpaad wow pynpsiah ya ka chnong cha Namdong.
U Darmi Liam na Thangrain da ong u hawa ong u pynyajan ya ki Constituency man i naam donhi heiwa da dawa u wow pyrkhat biang ya i phiah ya ki Constituency deiwa kynthup ya ki chnong wa marjan.
U D. War uwa man u Waheh Chnong ka Namdong-B da pyrchah joor u yei phiah ya ki Constituency deiwa ong wa ki dkhot ka Committee man ki ki Pnar wei toh u pyrkhat bniah yei bha i miat ki paidbah deiwa pynrap wa kyrmen wa i phiah ya ki Constituency ymtoh deiwa leh ki bru cha lyndet. Heijooh i por da ong u wa ka chnong da rai ko wa lada lai chaphrang ya ka Election deiwa phiah kamni ya ka Constituency kamtæ ha ka Election wot ka Polling Station leh ym em de hapoh ka chnong.
U Waheh Chnong ka Lapangap, u Deimonmitre da ong u wa i pyrchah ka chnong ya i phiah ya ka Constituency toh neidaw ka luti syngkieñ, ka yaaw ka haat, ka Block wa kiwi kiwi.
U Sanket Lamare uwa man u Waheh Chnong ka Raliang da ong u wa katkam wa man hi ka 15-Raliang Constituency da man ko kawa biang tangwa da kyrpaad u wow kynthup ya ka Mulum wow embynta ha ka Constituency.
U Bison Iano na Raliang da kyrpaad u leh ya ka Committee wow kynthup ya ka Mulum deilang waka Myntkhung cha ka Raliang Constituency.
U Thij Kanai uwa man u Waheh Chnong ka Kyrluh wa da pynhaap cha Raliang kamtæ da kyrpaad u wow pynhaap cha 26-Sumer kawa em ha East Jaiñtia Hills heiwa da ong u wa da chem chitom wow beh na chnong cha West Jaiñtia Hills wei hap ki u lai luti wa jngai.
U Aiban Shullai na Ladthadlaboh da ong u wa da pyrchah ya i tympiah ya ka chnong iwa booh hei maa wei iwa wanrah ya i sñiawyaphær ha ka chnong waroh kawi deiwa kyrpaad wow pyrkhat biang sa chisien ya i phiah ya ka Constituency. Da ong u leh wa hawa em i tdem em leh i diñ kamtæ da kyrpaad u ya ka Committee wa ymhoi u e laad ko wow kyrooh i diñ kamjooh leh wa lada lai ka Committee chaphrang wa i phiah Constituency ym yohsa ki wow lai cha yung Kasari.
U Abul Phawa uwa man u Waheh Chnong ka Mihmyntdu da ong u wa da chong yalang ki waheh ka chnong heiwa kwah ki u emlang chirup wa ka Sabahmuswang kamwa man nachwa khlem pyrchah ya ka Committee.
U Waheh Chnong ka Nongnah, u T. Iongwai da ong u wa da pdiang ka chnong ya i phiah ya ka Constituency deiwa ong wa dang lah u lai chwa katkam ka Constituency warim kamwa da ong u Waheh Chnong ka Mihmyntdu.
U Ricky Shylla na Tpep Pale da ong u wa i phiah ya ki Constituency toh iwa khlem yurim neibhah wym em lai ka Committee wow syllok ya ki chnong wei i rukom phiah Constituency man i kamwa tympiah ya u kchu-ja.
U M. Marboh na Salaroh da ong u wa da chong ya ka yalang paidbah ha chnong wei da pyrchah wow rah ya ka chnong cha Jowai South wei toh u pynneh kam nachwa ha Jowai North.
U Heiwon Shylla na Mustem da ong u wa ym hun ka chnong wow rah ya ka cha Jowai Central kamtæ da rai ki wow neh ha Jowai South.
U M. Thaiang uwa man u Asst. Waheh Chnong ka Mookyrdup da ong u wa em ko hapoh ka Ladthadlaboh Pyllun kamtæ emkaam u neh ko ha ka Jowai North ymtoh u phah ya ka cha Jowai Central.
U Snarbor Laloo kam u bru samen da ong u wa i phiah ya ki Constituency da leh da ki MDC wow suk wei u myntoi ya ki hi, da ong u wa kamwa 90% wa pyrchah ya i phiah Constituency pynyoo i wa em i bakla heiyatoh wa i phiah ya ka Constituency deiwa kyntu ya ka Committee wow chimkhia yeiwa kyrpaad ki paidbah deiwa laitlooid khlem em wa pynbor ya ki dkhot yong ka.
U RK Ram Rymbai kam uwa chong chnong na Jowai da ong u wa heipor wa sdang, u Chairman da pynbna u wa ynnin nei wym wan ki paidbah ha Amlarem ha ka Hearing pynyoo i wa da pdiang da hun ki paidbah ya ka wei ynne deiwa wan kiwa boon da pyrchah ki ya i phiah Constituency kamtæ toh u pyrkhat arisen heiyatoh wa ini.
Neiliang ka Committee da pyntip ko wa daw pdiang ko ya kiwon kiwon ki buit na ki paidbah wei ye u pynpoi ya ki hapoh 3:00 waje i sngi yong ka 19 tarik uni u bnai.
Discussion about this post